Deklarata e Partisë Demokratike për Klemend Balilin, ish-zyrtarin e LSI-së për të cilin ka një arrest ndërkombëtar për trafik droge, ka qenë një lëvizje e fortë politike.
Prej më shumë se dy muajsh, kur të gjithë e kishin harruar “Eskobarin e Ballkanit”, opozita shqiptare ka publikuar fotot e Balilit në një resort në Sarandë, ku sipas PD-së ndodhet edhe një drejtues i lartë i Policisë së Shtetit për pushime.
Opozita në këtë rast ka bërë detyrën e saj morale dhe politike për të denoncuar me fakte çdo gjë që është e gabuar dhe në shkelje të ligjit.
Por megjithatë, mbi çështjen “Balili” ka pikëpyetje të mëdha që kërkojnë sqarim e përgjigje, në radhë të parë nga Policia e Shtetit dhe qeveria.
Nëse dikush mund të thotë pse PD e ka denoncuar sot dhe jo kur nuk po realizohej arrestimi i Klemend Balilit, apo pse s’ka kërkuar nga Prokuroria që sekuestron pronat e “Eskobarit të Ballkanit” nëse ka prova mëse të mjaftueshme, kjo është shumë relative pasi PD nuk mund të marrë fajet e qeverisë.
Sot më shumë se dje, qeveria duhet të shpjegojë sa më shpejt dhe qartë si qëndron e vërteta për Klemend Balilin. Pse policia nuk e arreston kur është thënë se ka urdhër-arresti ndërkombëtar?!
Çfarë është roli i Rebani Jaupajt, numrit dy të Policisë së Shtetit dhe kreut të Departamentit të Krimit Ekonomik në “ruajtjen e Balilit”.
Jaupaj është zyrtari që ka mbajtur së bashku me Ardian Çipën lidhjet e ngushta me DEA-n në të gjithë aksionin e përbashkët antidrogë që grumbulloi provat për grupin e Klemend Balilit, pas së cilave u shpall në kërkim.
Disa media shqiptare kanë hedhur dyshimet prej ditësh se Balili është një “I penduar” dhe pritet t’i dorëzohet DEA-s. Si qëndron e vërteta, i takon vetëm Policisë së Shtetit dhe qeverisë ta zbardhë.
Klemend Balili ka qenë zyrtar i lartë i LSI-së për Sarandën dhe nipi i tij, Rigels Balili, është kryetar i Bashkisë së së Delvinës.
Askush nuk ka hetuar nga media shqiptare për këtë aferë, por shpërndahen vetëm deklaratat e partive politike, që në fakt duhen verifikuar dhe analizuar.
Deklarata e PD-së, nëse është e “pafajshme” apo thjesht në detyrën e saj denoncuese, është shumë e mirëpritur pasi përbën një denoncim të fortë, me fakte reale ndaj qeverisë.
Por edhe nëse ky fakt është një shërbim për të vënë më shumë në pah tradhëtinë e Edi Ramës ndaj Ilir Metës, pra një diversion politik, nuk është gjë tjetër veccse pjesë e lojës politike, pra pa asnjë thelb moral.
Por që të jetë sa më i fortë dhe sa më i besueshës aksioni politik, kërkonte që çështja të trajtohet në thelb jo vetëm me deklarata.
PD-ja duhet të çojë denoncimin e saj në Prokurori, e cila do të pyesë palët dhe gjithçka del më e plotë.
Por misteri “Balili” mbetet gjithnjë i tillë sa kohë që ndodh një absurd i pashpjegueshëm: policia, hem ka bashkëpunuar me DEA-n për të kapur grupin e Balilit edhe ka mbledhur provat, e hem e ruan “Eskobarin” dhe nuk e arreston.
Kontradikta do shpjeguar me detaje.
Të paktën Saimir Tahiri, por edhe Edi Rama janë të obliguar të japin sqarime…
/tesheshi.com/
