Këshilltari i lartë i Departamentit të Shtetit, Derek Chollet, nis të mërkurën një vizitë tre-ditore në Ballkanin Perëndimor.
Ai fillimisht do të vizitojë Shkupin, ku, siç njofton Departamenti i Shtetit, do të bisedojë me përfaqësuesit e Qeverisë së Maqedonisë së Veriut për një sërë çështjesh, përfshirë energjinë, ekonominë dhe luftën kundër korrupsionit.
Pas kësaj, ai do të udhëtojë për në Prishtinë, ku do të diskutojë me përfaqësues të institucioneve të Kosovës dhe shoqërisë civile për përpjekjet e SHBA-së për të ndihmuar në avancimin e integrimeve euroatlantike “përmes dialogut, me mbështetjen e Bashkimit Evropian për arritjen e një marrëveshjeje gjithëpërfshirëse për normalizimin e marrëdhënieve ndërmjet Kosovës dhe Serbisë, me fokus njohjen reciproke”.
“Normalizimi i marrëdhënieve ndërmjet Serbisë dhe Kosovës”
Chollet do të jetë në Beograd më 12 janar, ku me udhëheqjen serbe do të diskutojë sigurinë energjetike, integrimin ekonomik rajonal dhe përparimin drejt synimit të Serbisë për t’u bashkuar me BE-në.
Në deklaratën e Departamentit të Shtetit thuhet se do të diskutohet edhe për “rolin e Serbisë në forcimin e paqes dhe sigurisë rajonale dhe angazhimin e saj të vazhdueshëm në dialogun e udhëhequr nga BE-ja me qëllim të normalizimit të marrëdhënieve me Kosovën”. /tesheshi.com/
