Departamenti amerikan i Shtetit miratoi shitjen e një sasie mjetesh ushtarake me vlerë 5.4 miliardë dollarë për Arabinë Saudite, duke e konsideruar këtë një kontribut për politikën e jashtme dhe sigurinë kombëtare të SHBA-së.
Shitja pret miratimin e Kongresit që është njoftuar për kontratën që përfshin raketa Patriot, pajisjet shoqëruese dhe mbështetje logjistike.
“Ky propozim është një kontribut për politikën e jashtme dhe sigurinë e vendit, duke ndihmuar për përmirësimin e sigurisë së një partneri që ka qenë dhe vijon të jetë, një forcë e rëndësishme për stabilitetin politik dhe progresin ekonomik në Lindjen e Mesme”, thuhet në deklaratën e departamentit.
Pajisjet do të modernizojnë rezervën aktuale të raketave Patriot të Arabisë Saudite dhe do të mbështesin misionet e ardhshme mbrojtëse të vendit.
Koha e shitjes sipas disa gazetave përkon me vizitën e sekretarit amerikan të Mbrojtjes, Ash Carter në Arabinë Saudite javën e fundit. Udhëtimi i tij u konsiderua si një përpjekje për të “shitur” marrëveshjen e re bërthamore me Iranin dhe për të qetësuar shqetësimet në shtetet e rajonit, përfshirë edhe Arabinë Saudite. /tesheshi.com/
