Marrëveshja zgjedhore mes mazhorancës dhe opozitës jashtëparlamentare, mundësuar nga Këshilli Politik, është votuar më në fund me 97 vota pro, 6 kundër, 4 abstenim dhe me 6 deputetë që nuk morën pjesë.
E quajtur ndryshe si Marrëveshjen e 5 Qershorit, ajo donte vetëm 84 vota dhe, PS-ja e cila s’i kishte, vendosi që të hapë listat, si një kërkesë e brendaparlamentarëve, që të jepnin votën e tyre. Megjithatë, kreu i grupit demokrat Myslym Murrizi nuk e votoi marrëveshjen.
Më parë, kryeministri Rama mbajti një fjalim të gjatë në parlament, ku tha se ai, jashtë dëshirës së tij, do shtypte butonin për Lulzim Bashën.
“Unë sot butonin do e shtyp për Lulzim Bashën jo për veten time, do e shtypim botonin për ata që mungojnë. Në këtë negociatë ne kemi bërë vetëm një gjë: ç’a të doni ju shkruani”, tha Rama.
Shefi imazhorancës tha më tej se Këshilli Politik që mundësoi marrëveshjen, një mënyrë që PD të rifutej në sistem, ishte vullnet i mazhorancës dhe jo krijim ndërkombëtarësh.
“Dëgjova që Këshillin Politik e paska krijuar një aleancë globale SHBA-BE-OSBE. Nuk është e vërtetë!
E ka krijuar vullneti ynë, i PS-së, që është shumicë. PD-ja që kërkon të qeverisë ende nuk di të flasë shqip. Kjo ka qenë një gjë që i kam kërkuar Bashën në 2017: jo më anglisht, është turp i botës, nuk na respektojnë miqtë dhe partnerët nëse u japim bujarisht detyra që janë tonat”, theksoi Rama.
Më pas, duke sqaruar pozitën dhe llojin e sjelljeve me ndërkombëtarët, Rama paralajmëroi dhe hapjen e listave, e cila, siç saktësoi ai, do votohet me 30 qershor.
“Ne nuk jemi shërbëtorë të askujt. Jemi të ndërgjegjshëm se nuk jemi as SHBA, BE, as superfuqi bërthamore, por një vend i vogël, falë edhe miqve dhe partnerëve tanë. Por vjen puna do të hapim apo jo listat, këtë e vendosim ne, se pastaj do të ishte fundi. Këtë e vendosim ne. Dhe nuk kemi asnjë problem që ta diskutojmë dhe t’ua themi, sikur ua kemi thënë dhe besoj do të vazhdojmë ta themi kur të jetë e nevojshme, por nuk besoj se do të jetë e nevojshme për një kohë të gjatë. Ky Kuvend do të hapë listat në 30 korrik, kjo është marrëveshja“, tha Rama. /teshesh.com/
