Spanja dhe Italia do të takohen në fillim të shtatorit për kualifikueset europiane të Botërorit 2018; sfida përcaktuese për vendin e parë në grupin G të eliminatoreve, ku bën pjesë dhe Shqipëria.
Të dy përfaqësueset kanë zbritur në fushë të mërkurën në ndeshje miqësore ndaj ekipeve amerikanolatine. E suksesshme ka qenë miqësorja për Italinë, që ka fituar 3-0 ndaj Uruguajit. Paksa më ndryshe ka shkuar për Spanjën, që edhe mund të kishte humbur ndaj Kolumbisë, duke barazuar gjithsesi 2-2.
Italia dhe Uruguaji u përballën në një fushë asnjanëse, në “Allianz Riviera” të Nisës. Luis Suarez dhe Cavani ishin dy mungesat e mëdha për amerikanolatinët, ndërkohë që italianët kishin një formacion më të kompletuar.
Gimenez do të shënonte në minutën e 7-të një autogol të veçantë, paksa të habitshëm e spektakolar. Dy golat e tjerë për Italinë në fitoren 3-0 do të vinin në fundin e lojës. Eder realizoi në minutën e 83-të, De Rossi ktheu në gol një 11-metërsh në minutën e 92-të.
Spanja qe pranë humbjes ndaj Kolumbisë, edhe pse ishte gjendur më herët në epërsi. Morata, një lojtar
në hije te Reali, do t’i jepte barazimin ekipit të tij tre minuta para mbarimit të lojës.
David Silva do të shënonte fillimisht për vendasit; një gol i barazpeshuar nga ai i Cardona-s po në pjesën e parë. Falcao do të sillte rishtas avantazhin për kolumbianët, ndër të cilët bëri një paraqitje mjaft të mirë James Rodriguez.
Barazimi 2-2 i la të kënaqur të dy ekipet. /tesheshi.com/
