Në një mbrëmje të marte të mbushur me takime miqësore, pa dyshim që ndeshja mes Gjermanisë dhe Italisë tërhiqte më tepër vëmendje. Pa fitore ndaj italianëve që në 1995-ën, 21 vite të shkuara, e me një humbje ndaj anglezëve në Berlin të shtunën e kaluar, pritej me interes të shihej reagimi i gjermanëve. Që ka qenë më i miri i mundshëm.
4-1 ka përfunduar miqësorja e luajtur në “Allianz Arena” të Mynihut. Kroos, Gotze, Hector dhe Ozil ishin shënuesit për gjermanët, që u treguan të papërmbajtshëm ndaj italianëve, specialistëve të mbrojtjes. Goli i nderit për miqtë u shënua nga Shaarawy, i futur në lojë në pjesën e dytë. Një fitore e vyer për gjermanët, që treguan se nuk e kanë humbur shkëlqimin e ngahershëm, e se janë pretendentë kryesorë në Euro 2016.
E befasishme qe fitorja e Holandës ndaj Anglisë në Londër, në “Wembley”. Anglezët kishin fituar pak ditë më parë ndaj Gjermanisë, por nuk ia dolën ta ruajnë vazhdimësinë, duke humbur ndaj një Holande tërësisht eksperimentale.
Lajmi më i mirë për anglezët në humbjen 1-2 është ecuria e Vardy-t, sulmuesit të Lestërit, që shënoi sërish e flitet të jetë në krye të listës së dëshirave të Realit të Madridit. Golat për holandezët u shënuan në pjesën e dytë nga Janssen e Narsingh, duke e kthyer përmbys disavantazhin e 45 minutave të para.
Franca e shfaqi edhe një herë forcën e vet. Viktima këtë herë qe Rusia, e cila u mposht 4-2. Në një ndeshje të luajtur në “Stade de France” të Parisit nën masa të rrepta sigurie, gjelat francezë treguan karakter e efikasitet para portës kundërshtare. Golat për vendasit u shënuan nga Kante, Gignac, Payet e Coman, teksa miqtë u përgjigjën me golat e realizuar nga Kokorin e Zhirkov.
Ndryshe Shqipërisë, përfaqësuesja turke ia doli të fitojë ndaj austriakëve në Vjenë. Austri – Turqi përfundoi 1-2, me golat të shënuar për turqit nga dy yjet e skuadrës, Hakan Çalhanoğlu dhe Arda Turan. Kjo qe fitorja e dytë e Turqisë në miqësoret, pas asaj ndaj Suedisë të enjten e kaluar.
Ndër miqësoret e tjera, Zvicër – Bosnjë-Hercegovinë përfundoi 0-2, Suedia barazoi 1-1 me Çekinë, Irlandë – Sllovaki pati rezultat final barazimin 2-2, e Portugalia fitoi 2-1 me Belgjikën. /tesheshi.com/
