Kryeministri francez, Manuel Valls, është përplasur me ministren për Edukim, në një kohë të ndarjeve në rritje brenda qeverisë franceze, në lidhje me ndalimin e diskutueshëm të veshjes së burkinit në disa plazhe të vendit.
Ministrja për Edukim, Najat Vallaud-Belkacem, ka qenë shumë kritike ndaj ndalimit të kësaj veshjeje, sidomos imazheve me disa policë që detyrojnë një grua që të zhvishet e të tjerë që vendosin gjoba.
Vallaud-Belkacem, e cila ka lindur në një familje muslimane në Marok, tha se përhapja e këtij gjesti policor nëpër disa qytete bregdetare të Francës nuk ishte i mirëpritur.
Sipas saj, ndalimi i burkinit “hap portën për diskriminim racor”.
“Kjo hap rrugën për slogane raciste”, tha ajo në një intervistë në radio, disa orë para se gjykata e lartë administrative e Francës, Këshilli i Shtetit, të shqyrtojë ndalimin e vendosur nga këshillat lokale të 30 komuniteteve bregdetare”.
“Kjo ngre çështjen e lirive individuale”, tha Vallaut-Belkacem për Europe 1.
“Shoqëria ime ideale është ajo shoqëri ku gratë janë të lira dhe krenare me trupin e tyre”, tha ajo, duke shtuar se në situatën në të cilën janë shtuar tensionet pas sulmeve terroriste nga Shteti Islamik, “nuk duhet t’i shtojmë benzinë në zjarr, duke ndaluar burkinin”.
Disa momente pas prononcimit të Vallaud-Belkacem, komentoi edhe kryeministri Valls, i cili përsëriti mbështetjen e tij për kryebashkiakët e komunave të cilët kanë ndaluar veshjen e burkinit. /tesheshi.com/
