Një deklaratë e fundit e ministres së Mbrojtjes, Mimi Kodheli, tregon se qeveria e vuan shumë faktin që tre vjet më parë, kur sapo kishte mbushur tre muaj qeverisje, u përballë me një valë të paparë protestash civile kundëe ardhjes së armëve kimike të Sirisë për t’u demontuar në Shqipëri, sipas një projekti amerikan. Kodheli ka përmendur faktin se ato armë, u demontuan pak më tutje, në Bari të Italisë fqinje, krejt normal, e askush nuk u ngrit në protesta.
“Armët kimike, në fakt lëndët kimike, pasi vetëm kur bashkohen bashkë shndërrohen në armë kimike, për të cilat u ngrit një shoqëri e tërë në këmbë, janë asgjësuar pak milje larg bregdetit shqiptar, në një port në Bari, Itlai. Askush nuk u ngrit atje kundër këtyre lëndëve, pasi kishin marrë garanci nga ndërkombëtarët. Garanci që e dhanë edhe në vendin tonë“, ka thënë gruaja në krye të mbrojtjes shqiptare.
Kujtojmë se Rama iu përgjigj me një “Jo” Uashingtonit që qëndronte në pritje të “Po”-së, mas së cilës sekretari Kerry do vinte me vërtik në Tiranë. Kjo për shkak të një presioni të madh të opinionit, i cili për një moment nisi ta shikonte veten duke dhënë shpirt nga kimikatet e armëve të shpërndara gjithandej. Politikisht, ajo u regjistrua si e para dhe e vetmja protestë anti-amerikane e shqiptarëve në historinë e raporteve mes dy vendeve. /tesheshi.com/
