Kreu i Rendit, Fatmir Xhafaj, ka dhënë një premtim të fortë nga Uashingtoni, atë që shumë shpejt, do të merret vesh se kush janë autorët e 618 kg kokainë të bllokuar në Maminas. Duke folur në një intervistë për VOA-n, Xhafaj tha:
“Për aq sa më lejohet mua të marr informacion, për aq sa më lejohet mua të di lidhur me informacione të kësaj natyre, jam në dijeni se hetimet po përparojnë, dhe unë besoj se shumë shpejt prokuroria e Krimeve të Rënda do të arrijë të identifikojë se cilët kanë qenë të përfshirë në këtë veprimtari kriminale”.
Ndër të tjera, ministri Xhafaj u pyet dhe në lidhje më rastin “Balili”, duke garantuar se dhe ai një ditë do të gjendet.
“Jemi duke u marrë seriozisht edhe ne, edhe vetë DEA, por edhe disa agjenci homologe të vendeve europiane. Së pari kemi hapur një proces hetimor lidhur me pasurinë e këtij grupi kriminal dhe nga ana tjetër jemi duke u marrë fort me kërkime për të identifikuar dhe zbuluar vendndodhjen e tij dhe për ta vënë përpara drejësisë”, theksoi ministri Xhafaj. /tesheshi.com/
