Duke prezantuar projektligjin e vetingut në polici në komisionin e Ligjeve, ministri i Rendit Fatmir Xhafaj lajmëroi nisjen së shpejti dhe të një vetingu në politikë.
“Shumë shpejt do kemi vetting në politikë, në mënyrë të veçantë të atyre që kanë pasur rol vendimmarrës në fatet e këtij vendi dhe në pasuritë e qytetarëve të këtij vendi. Veting-u ne politikë le të fillojë nga Ministri i Brendshëm”, deklaroi Xhafaj duke iu referuar vetes, për të cilin opozita pretendon se i vëllai është me precedentë penalë.
Sa për vetingun në radhët e policisë, ministri Xhafaj tha se çdo punonjës policie do të jetë i survejuar nga më shumë se tre struktura për punën, jetën private dhe ligjore.
“Procesi i vlerësimit kontrollon figurën dhe pasurinë e punonjësve të policisë. Synimi ynë është promovimi i punonjësve të ndershëm. Ky proces duhet të jetë transparent dhe i paanshëm”, shtoi ai.
Nga ana tjetër, procesit të vetingut do t’i nënshtrohen dhe kontigjentet në lirim. “Procesit të vlerësimit do t’i nënshtrohen ata që kanë gradë policore dhe me vullnetin e tyre edhe ish-punonjësve të policisë që u lejohet rikthimi në detyrë. Mund të rikthehen ata punonjës që larguar nga rikonstruktimi i strukturës në kohë të ndryshme. Edhe ata që janë larguar nga detyra, por që kjo masë është hequr me vendim gjykate”, saktësoi kreu i Rendit. /tesheshi.com/
