Omer Çelik, ministri për çështjet e BE-së në qeverinë e re turke, ka thënë sot se “anëtarësimi i Turqisë në Bashkimin Europian është i rëndësishëm, por nuk është alternativa e vetme e vendit.”
Ai e ka akuzuar BE-në për standarde të dyfishta në luftën kundër terrorizmit, duke kërkuar heqjen dorë prej tyre.
Komentet janë bërë gjatë marrjes së detyrës nga ministri i mëhershëm, Volkan Bozkër, dhe vijnë në një moment tensioni mes vendit euroaziatik dhe BE-së në lidhje me një marrëveshje për heqjen e vizave.
Bashkimi Europian kërkon prej Turqisë përmbushjen e kritereve. Kushti për ndryshimin e ligjit kundër terrorit është thembra e Akilit në përplasjen më të fundit mes palëve.
Presidenti turk deklaroi dje se nëse nuk ngjet heqja e vizave, kjo do të ketë ndikim të menjëhershëm në marrëveshjen për ripranimin e refugjatëve, duke e bllokuar atë.
Në të njëjtën ditë, ministri i Jashtëm turk, Mevlyt Çavushogllu, pohoi se vendi i tij as po bënte blof, e as po kërcënonte teksa deklarohej se do të pezulloheshin të gjitha marrëveshjet e nënshkruara me BE-në, mes të cilave marrëveshja e ripranimit.
Bashkimi Europian duhet të tregohet i ndershëm me Turqinë, do të thoshte kryediplomati turk. /tesheshi.com/
