Halid el-Falih, me t’u vënë në krye të Ministrisë së Energjisë, Industrisë dhe Burimeve Minerale, ka shprehur angazhimin e tij për përmbushjen e kërkesave të tregut global për naftë dhe për një politikë të qëndrueshme në këtë fushë.
“Ne jemi të angazhuar të ruajmë rolin tonë në tregjet ndërkombëtare të energjisë dhe të forcojmë pozitën tonë si furnizuesi më i besueshëm në botë i energjisë.”
El-Falih, që përpara detyrës së re ka qenë drejtues i kompanisë gjigande shtetërore të naftës, i Aramco-s, ka garantuar se Arabia Saudite do të vijojë me politikat e qëndrueshme mbi naftën.
Ministri i i ri është shprehur optimist në objektivin për ta nxjerrë ekonominë saudite nga varësia prej naftës. Ai ka shprehur bindjen se vendi i tij do të bëjë përpara në objektivin e diversifikimit të ekonomisë, një proces që zë një vend të posaçëm në planin e quajtur Vizioni 2030.
Rënia e madhe e çmimit të naftës e ka detyruar Arabinë Saudite të kërkojë rrugët për t’i bërë të larmishme burimet ekonomike, duke e shmangur dalëngadalë varësinë nga të ardhurat prej naftës.
Në një post me rëndësi të jashtëzakonshme, El-Falih pasoi në detyrë Ali el-Naimin, që e pati drejtuar sektorin për dy dekada. /tesheshi.com/
