Kryeministri i Kosovës, Isa Mustafa, është mërzitur se një ministër i tij ka dalë kundër anëtarësimit të Kosovës në FIFA dhe UEFA, por nuk e ka shkarkuar atë.
Bëhet fjalë për ministrin e Pushtetit Lokal Lubomir Mariq, i cili jo vetëm që nuk pëlqen që Kosova ka hyrë në organizatat botërore dhe europiane të futbollit por shtoi se ishin bërë kundër ligjit.
Kurse Mustafa tha se do të kërkojë sqarim nga ministri Mariq, për deklaratat e tij.
“Do të bisedoj me të. Deklaratat disa prej tyre nuk janë në kompetencën e tij dhe në fushën e tij që ai të merret me to, sepse janë politika qeveritare dhe ministrat i kanë punët në fushat e tyre dhe ata duhet të angazhohen që ta bëjnë punën në atë fushë në të cilën janë. Por gjithsesi për mua disa prej këtyre deklaratave, janë të papranueshme, të cilat do të ia prezantoi zotit Mariq dhe nuk do të dëshiroja që më tutje, ndonjë prej ministrave të merret me gjëra të tilla”, tha Mustafa.
Ndërsa sa i përket raporteve të partnerëve të koalicionit, duke marrë parasysh deklaratat e zëvendësministri të Financave Isni Kilaj, i cili ka drejtuar kritika për ministrin Avdullah Hoti dhe Qeverinë duke thënë se LDK po punëson njerëz në institucione, Mustafa tha se këto nuk janë punë të zëvendësministrave, por janë punë të tij dhe Veselit.
“Zëvendësministrat të bëjnë punën e tyre në ministri. Sepse nuk është kjo punë e zëvendësministrave. Kjo është punë e partnerëve të koalicionit dhe këta partnerë kryesor të koalicionit, tani jemi unë dhe z. Veseli që është kryetar i PDK-së dhe ne të dy drejtojmë çështjet e koalicionit. S’është punë e tjerëve”, tha Mustafa./tesheshi.com/
