Ministri i Jashtëm i Turqisë, Mevlut Çavusoglu ka kritikuar të shtunën fokusin e një takimi ministror të nivelit të lartë të mbajtur në Paris që kishte për synim ndalimin e luftimeve në Halep.
Çavusoglu sugjeroi me pak ironi që ministrat e jashtëm të ftojnë Asadin dhe mbështetësit në takim, meqënëse gjithë kohën ata po debatonin për kërkesat e parashtruara prej tij dhe mbështetësve.
Kreu i diplomacisë së Ankarasë tha se situata në Halep është duke u përkeqësuar nga dita në ditë.
“Regjimi dhe mbështetësit e saj janë duke bombarduar vazhdimisht Halepin. Civilët po vdesin dhe është pothuajse e pamundur që ndihmat humanitare të arrijnë në rajon”, tha ai.
Çavusoglu tha se bisedimet duhet të përqendrohen në gjendjen e civilëve në Halep.
“Në vend që të përqëndrohemi në zgjidhje politike dhe në një armëpushim të përgjithshëm, ne vetëm jemi duke iu përgjigjur kërkesave të regjimit dhe mbështetësve të saj. Askush nuk ofron zgjidhje konkrete për sigurimin e popullsisë civile dhe opozitës të cilët do të lënë përfundimisht qytetin e Halepit”.
Takimi ndërkombëtar i organizuar nga ministri i jashtëm francez Jean-Marc Ayrault u mbajt me prezencën e kombeve që mbështesin opozitën e moderuar siriane.
Koordinatori i opozitës siriane, Riyad Hijab dhe president i këshillit lokal të Halepit Brita Hagi Hasan po ashtu morrën pjesë në takim.
Përshkallëzimi i fundit vjen ndërkohë që regjimi i Asadit i mbështetur nga Rusia, ka ndërmarrë ofensive tokësore dhe nga ajri për të vënë nën kontroll pjesët lindore të Halepit, të kapur nga grupet e armatosura opozitare katër vjet më parë. /tesheshi.com/
