Abdullah Hoti, Ministri i Financave të Kosovës tha se buxheti për vitin e ardhshëm është rritur afro 400 milionë euro. Nga 1 miliard e 598 milionë euro që ishte vitin e kaluar, këtë vit ai është mbi 2 miliardë.
“Kuvendi ka aprovuar buxhetin për vitin 2017 prej mbi 2 miliardë euro, më të lartin që ka pasur Kosova ndonjëherë, i cili është paraprirë nga konsultime e shumta me të gjitha palët e invovluara, përfshirë në veçanti shoqërinë civile”, u shpreh ai.
Ministri i Financave tha se ky është buxhet që merr parasysh objektivat zhvillimore dhe sociale, të përcaktuara në Strategjinë Kombëtare për Zhvillim, Programin për Reforma Ekonomike, Kornizën Afatmesme e Shpenzimeve dhe Strategjitë sektoriale.
“Ky buxhet ka pajtimin e plotë të Fondit Monetar Ndërkombëtar dhe me aprovimin e tij ne kemi plotësuar kriterin kryesor për vitin 2016 në kuadër të këtij programi”, theksoi Hoti.
Ai tha se, Buxheti i Kosovës për 2017-tën dhe projeksionet për dy vitet në vijim sigurojnë rritje ekonomike prej mbi 4%, përmes dy elementeve: rritjes së investimeve kapitale dhe mbështetjes për reforma strukturore.
Ministri i Financave theksoi veçmas edhe faktin se, “buxheti i komunave është në vlerë prej 440.2 milionë euro, që është një rritje prej 15 milionë krahasuar me vitin 2016”.
Ai bëri të ditur se, në kuadër të financimit total janë përfshirë edhe mjetet e privatizimit të aseteve shoqërore nga Agjencia Kosovare e Privatizimit në shumë prej 88 milionë euro dhe se, të gjitha këto mjete, pa përjashtim, janë ndarë për projekte kapitale. /tesheshi.com/
