Ministri izraelit i Sigurisë Kombëtare, Itamar Ben-Gvir tha se do të dëshironte të shihte më shumë kolonë hebrenj në Bregun Perëndimor, pasi zyrtarët evropianë dhe amerikanë shprehën shqetësimin për vendimin e Izraelit për t’i dhënë vendbanimeve statusin komunal.
“Toka e Izraelit i përket popullit të Izraelit”, tha ai, pasi njoftoi shqetësimet e Uashingtonit dhe aleatëve evropianë, Francës, Gjermanisë, Italisë dhe Britanisë së Madhe për ndërtimin e vendbanimeve të reja hebraike, raporton Reuters.
Të dielën, Izraeli lëshoi një autorizim retroaktiv të nëntë vendbanimeve izraelite në Bregun Perëndimor të pushtuar dhe njoftoi ndërtimin masiv të shtëpive në vendbanimet e reja, pas së cilës Sekretari amerikan i Shtetit Antony Blinken tha se ishte “thellësisht i shqetësuar” nga masa.
“Ky është misioni ynë, kjo është doktrina jonë. Nëntë vendbanime janë të mira, por jo të mjaftueshme. Ne duam më shumë”, tha Ben-Gvir.
Njoftim për ndërtimin e 10,000 banesave
Komuniteti ndërkombëtar i konsideron të gjitha vendbanimet hebraike në zonë si të paligjshme, gjë që Izraeli e kundërshton dhe palestinezët i shohin ato si pengesën kryesore për të bërë paqe me Izraelin.
Autoritetet izraelite kanë paralajmëruar ndërtimin masiv të banesave në vendbanimet e sapokrijuara dhe ministri i Financave Bezalel Smotrich tha se bëhet fjalë për rreth 10.000 shtëpi.
Palestinezët kërkojnë që të gjitha vendbanimet dhe postat hebraike të largohen nga Bregu Perëndimor dhe Jerusalemi Lindor, pra nga territoret ku Palestina aspiron të ndërtojë një shtet të ardhshëm.
Izraeli ka ndërtuar pothuajse 140 vendbanime në Bregun Perëndimor, ku jetojnë pothuajse 600,000 hebrenj, që kur pushtoi Bregun Perëndimor dhe Jerusalemin Lindor në luftën e vitit 1967. /tesheshi.com/
