Ministri për Integrime Europiane, Bekim Çollaku ende nuk mund të jap ndonjë datë apo muaj se kur Kosova do të marrë rekomandimin për liberalizim të vizave. Krejt çka ai mund t’ju thotë qytetarëve, është vetëm se shpreson që kjo të ndodh në muajin mars të këtij viti. Por ajo që do të mund t’jua mohojë lëvizjen e lirë pa viza kosovarëve, mund të jetë mos ratifikimi në Kuvend i marrëveshjes së Demarkacionit me Malin e Zi.
Çollaku, i cili sot raportoi para komisionet parlamentar për integrime, lidhur me raportin e fundit dërguar Bashkimit Evropian, tha se ajo çka do të rrezikonte këtë proces, do të ishte vazhdimi i valës së migrimit nga Kosova.
Gjithashtu, sipas tij, nëse ratifikimi i marrëveshjes së demarkacionit me Malin e Zi nuk do të bëhet deri në verë të këtij vit, do krijojë problem për hyrjen në fuqi të vendimit për liberalizim.
Deputetja e LDK-së Vjosa Osmani kërkoi të sqarohet çështja e ratifikimit të marrëveshjes për demarkacionin me Malin e Zi.
Ministri Çollaku sqaroi se mos-ratifikimi i saj deri në verë të këtij viti, do të krijonte problem në zbatimin e vendimit për liberalizim të vizave.
“Është kriter monitorues dhe mos-ratifikimi i saj deri më tani nuk do ta pengoj dhënien e rekomandimit, mirëpo është kriter i domosdoshëm dhe ratifikimi duhet të ndodhë patjetër nëse qytetarët e Kosovës duan të lëvi zin lirshëm dhe pa viza. Që i bie, nëse nuk do të ratifikohet deri në verë të këtij viti atëherë do të shndërrohet në një pengesë për hyrjen e vendimit në fuqi për liberalizim të vizave”, tha ai. /tesheshi.com/
