Ministri i Ekonomisë në qeverinë “Rama”, Arben Ahmetaj, ka dhënë tjetër shifër nga ajo e ofruar në formë denoncuese nga kryedemokrati Basha, në lidhje me bizneset e mbyllura në muajin janar.
“Ekonomia matet me shifra dhe shifrat, përtej emocioneve politike, janë lehtësisht të verifikueshme. Në janar 2018 janë regjistruar ne Qendren Kombetare te Biznesit 2394 biznese të reja dhe janë c’regjistruar 732. Efekti neto, është 1662 biznese të reja në ekonomi, nga 1425 që ishin në janar 2017, ose thënë ndryshe, një rritje prej 237 biznesesh më shumë se një vit më parë, vetëm për muajin janar.
Përmirësimi i mëtejshëm i terrenit ekonomik dhe klimës se biznesit është sfidë që vazhdon, por koha kur bizneset mbyllnin qepenat për shkak të frikës e pasigurisë, për shkak të gjobave elektorale dhe borxheve kolosale të qeverisë ndaj tyre, është e shkuar e largët për sipërmarrjen shqiptare”, shkruan Ahmetaj.
Ndërsa Basha, në shifrën që dha, përmbi 1700 biznese të mbyllura, sigurisht duke iu referuar shifrave zyrtare, e konsideroi këtë si një alarm për ekonominë. /tesheshi.com/
