Pas ngritjes së aktakuzës për shpërdorim të detyrës zyrtare ministri i Mjedisit, Ferid Agani ka kërkuar nga kryeministri që ta lirojë nga detyra deri në momentin e shpalljes së vendimit nga ana e gjykatës.
Zëdhënësi i qeverisë, Arban Abrashi, ka thënë se kërkesën e Aganit, kryeministri Isa Mustafa do ta trajtojë javën e ardhshme pasi sot nuk kanë mundur ta bëjnë një gjë të tillë për shkak të angazhimeve rreth ligjeve për EULEX-in.
Në vijim mund ta lexoni letrën e plotë të ministrit Agani:
“I nderuari z. Kryeministër,
Duke pas parasysh ngritjen e aktakuzës nga Prokuroria e Shtetit ndaj meje;
I bindur në pafajësinë time të plotë përkitazi me çështjen që është subjekt i aktakuzës;
Në pajtim me parimin e qeverisjes së pastër pa asnjë dyshim në bartësit e funksioneve publike; dhe i përkushtuar që drejtësia të kryej punën e saj në mënyrë të papenguar, kërkoj nga Ju që të më lironi nga detyra e Ministrit të Mjedisit dhe Planifikimit Hapësinor deri në momentin e shpalljes së pafajësisë sime të plotë”.
