Në nisje të një jave “të nxehtë” politike, siç cilësohet nga analistët, që presin zgjidhjen e krizës përmes ndërhyrjes së faktorit ndërkombëtar, ishte së pari ministri i Jashtëm holandez, Bert Koenders e më pas ai gjerman, Sigmar Gabriel që kërkuan zbatimine vetingut dhe nisjen e dialogut politik mes palëve në Tiranë.
Ministri i Jashtëm gjerman, Sigmar Gabriel u shpreh i shqetësuar se reforma në drejtësi po pengohet, duke thënë se nuk e kupton bojkotimin e Parlamentit nga opozita.
“Reforma në drejtësi është shumë e rëndësishme. Shteti ligjor garanton se në qendër të vëmendjes janë interesat e qytetarëve. Reforma në drejtësi po pengohet dhe nuk e kuptojmë se si parlamentarët bojkotojnë Parlamentin”, tha Gabriel në një konferencë të përbashkët për shtyp me ministrin e Jashtëm, Ditmir Bushati.
“Pas pak javësh ka zgjedhje dhe normalja është që nëse deputetët janë të pakënaqur me qeverinë, ta tregojnë këtë në fushatën elektorale. Në demokraci, duhet respektuar Kushtetuta dhe shumica. Këtë gjë duhet të bëjnë ato shtete që duan të bëhen pjesë e BE-së. Gjendja duhet ndryshuar përmes zgjedhjeve dhe jo nëpërmjet bojkotit të Parlamentit. Bojkoti nuk është rrugë e pranueshme për të shprehur vullnetin”, shtoi Gabriel.
Më herët, po nga një dalje e përbashkët me Bushatin, ministri i Jashtëm holandez, Bert Koenders kërkoi zbatimin e vetingut, por duke vënë në dukje se edhe zgjedhjet e lria e të ndershme janë një domosdoshmëri.
