Një mini “Gërdec” ka tronditur Lushnjën, duke lënë të vdekur një person dhe plagosur disa të tjerë, mes tyre dhe deputeti socialist Bujar Çela, i cili ka qenë në biznesin e tij afër shpërthimit.
Nuk është fjala për një ngjarje kriminale, por për një incident me pasojë tragjike që, siç thuhet paraprakisht, ka ardhur si pasojë e kontaktit të një vinçi me një kabëll të tensionit të lartë.
Më saktë, ngjarja ka ndodhur në një objekt në ndërtimi ku gjatë punimeve ka pasur kontakt me linjën e tensionit të lartë, e cila ka rënë mbi depozitën e gazit që shërbente për të furnizuar bizneset e dy magazinave.
Njoftimi policor thotë: “Rreth orës 16:05 në vendin e quajtur ‘Rrethrrotullimi i Plasmasit’, në një kapanon në ndërtim dyshohet se gjatë punës, një vinçier duke drejtuar një vinç, aksidentalisht ka prekur linjën e tensionit të lartë dhe për rrjedhojë ka ndodhur një shpërthim i fuqishëm.
Si pasojë e shpërthimit ka humbur jetën shtetasi L. V., dhe janë plagosur 8 shtetas mes tyre dhe deputeti B. Ç., të cilët ndodhen në spital për ndihmë mjekësore.
Menjëherë, nga Drejtoria Vendore e Policisë Fier dhe Komisariati i Policisë Lushnjë është ngritur një grup i posaçëm hetimor dhe nën drejtimin e Prokurorisë vijon puna për zbardhjen e rrethanave dhe shkakut të shpërthimit”,.
Viktima i identifikuar si Landi Verçani ishte manovratori i vinçit, ndërsa të lënduarit e tjerë, disa prej të cilëve janë dërguar në spitalin e Traumës ishin punëtorë.
Deputeti i zonës Bujar Çela i cili i është nënshtruar një ndërhyrjeje kirurgjikale, po ndiqte punimet.
Në vendin e ngjarjes, mbërriti edhe ministri i Brendshëm, Tualant Balla, i cili po ashtu shkoi edhe në spitalin e Lushnjes, ku ishin disa prej të plagosurve, mes tyre edhe deputeti. /tesheshi.com/
