Të mbledhur për të diskutuar se si do tërhiqen apo shpenzohen gjashtë milliard euro të BE-së për Ballkanin Perëndimor, në atë që quhet Plani i Rritjes, për Albin Kurtin, bashkëpunimi rajonal nis nga tjetërkund.
Kështu, në tryezën e Kotorrit në Mal të Zi, me prezencën dhe të Vuçit aty, sigurisht dhe të BE-së e SHBA-së, Kurti pati një kërkesë si fillim.
“Marrëdhëniet e mira fqinjësore në rajonin tonë janë të domosdoshme…Kërkoj nga Serbia që ta dorëzojë Milan Radoiçiqin në Kosovë dhe gjithashtu dhe grupin e tij paramilitar që e kanë vrarë rreshterin tonë Afrim Bunjaku më 24 shtator”, tha Kurti.
Më pas, narrativa e tij ndryshoi tërësisht:
“Teksa jemi mbledhur këtu për të diskutuar rrugën drejt Europës suksesi i Kosovës duhet të njihet. Kjo është strategjia me efikase për të forcuar lidershipin në Ballkanin Perëndimor.
Nëse ka një mesazh që do të doja t’i dërgoja Bashkimit Evropian nga Kotori është që të kontrollojë progresin e reformave demokratike në vendet e Ballkanit. Më lejoni të adresohem për progresin që kemi bërë. Në Kosovë Plani i Rritjes përfaqëson një mundësi për t’u bashkuar me tregun e përbashkët. Përmbushja e reformave të agjendës qeveritare është thuajse e përfunduar”, u shpreh kryeministri i Kosovës ndër të tjera. /tesheshi.com/
