Vendi i gjashtë në renditje, një barazim pa gola në ndeshjen e fundit në “San Siro” ndaj Karpit, një lojë apatike, që nuk të ngjall shpresë. Ky është dhe Milani i Cristian Brocchi-t, i ngjashëm me atë që kemi parë më herët.
Brocchi u mor për të zëvendësuar Mihajlovic-in, i shkarkuar ditë më parë pasi dështoi të mëkëmbte një Milan që vuan prej kohësh.
Ish-mesfushori i Milanit drejtonte ekipin e të rinjve kur u thirr për t’u ulur në stolin e seniorëve. Ai ka një kontratë deri në fund të sezonit, çka do të thotë se nuk është aspak e sigurt nëse ai do të vijojë të punojë në këtë nivel. Paraqitjet e pandryshueshme të skuadrës nuk të lënë përshtypjen se Brocchi do ta çojë gjatë në krye të skuadrës emblematike.
Lippi, Sousa dhe Montella janë tre emrat që përmenden për të marrë drejtimin e Milanit në sezonin pasues.
Marcello Lippi është i pari në listën e të diskutuarve. Ai është goxha në moshë tani, e gjendet pa punë që kur la ekipin kinez Guangzhou Evergrande. Në Itali nuk drejton një skuadër që prej 2004-ës, kur do të hiqte dorë nga Juventusi për të marrë kombëtaren italiane.
Një nga alternativat është që Brocchi të qëndrojë në stol, ndërsa Lippi do të jetë një lloj këshilltari për të.
Vincenzo Montella, ish-sulmuesi “aeroplan” i Romës, që ka bërë një punë të pëlqyeshme si te Fiorentina apo te Sampdoria, është po ashtu një kandidaturë e mundshme.
Emri i tretë është ai i portugezit Paulo Sousa, trajnerit aktual të Fiorentinës. Një njohës i mirë i futbollit italian, ku ka zhvilluar dhe një pjesë të karrierës së tij si futbollist, ai pëlqehet në qarqet e Milanit, e nuk është çudi që të zgjidhet për ta drejtuar Milanin. /tesheshi.com/
