Pasi kanë çuar ditë të tëra në stacionin qendror hekurudhor në Budapest, një pjesë e mirë e refugjatëve janë përcjellë për në kufirin me Austrinë.
Qeveria hungareze ka dërguar rreth 100 autobusë për t’i mbartur refugjatët, ndërsa Austria ka njoftuar se është rënë dakort me Gjermaninë që t’u hapë dyert atyre. Autoritetet austriake lajmëruan se pavarësisht rregullave të BE-së, do t’i lejonin refugjatët të hynin në vendin e tyre.
Ka qenë vetë kancelari austriak, Werner Faymann, që ka pohuar të premten se refugjatët do të lejohen të hyjnë në Austri dhe Gjermani, “Për shkak të situatës së sotme emergjente në kufirin hungarez, Austria dhe Gjermania bien dakort për një vazhdim të udhëtimit të refugjatëve në vendet e tyre.”
Numri i të mbërriturve në kalimin kufitar mes Hungarisë dhe Austrisë është 2.000 gjer tani, por pritet që ai të rritet masivisht gjatë së shtunës.
Refugjatëve do t’u jepet fillimisht ushqim, për t’u vijuar më tutje me regjistrimin e tyre.
Hungaria është bërë pika kryesore hyrëse për refugjatët që vijnë nëpërmjet Ballkanit, për të kaluar më pas drejt vendeve të tjera të BE-së.
Linjat hekurudhore që të çojnë në Austri dhe Gjemanisë janë pezulluar prej ditësh, teksa zyrtarët e Budapestit deklarojnë se, sipas rregullave të BE-së, janë të detyruar t’i regjistrojnë të gjithë azilkërkuesit.
Situata në stacionin kryesor hekurudhor të kryeqytetit hungarez ka qenë e tensionuar, shoqëruar me incidente sporadike. Rreth 1.000 refugjatë e lanë dje stacionin e trenave dhe u nisën në këmbë drejt kufirit me Austrinë, duke e parë këtë si të vetmen mundësi.
Përcjellja me autobusë e refugjatëve drejt Austrisë i ka dhënë zgjidhje krizës së momentit në kryeqytetin hungarez. /tesheshi.com/
