Një gjykatë në Mianmar, një shtet i administruar nga ushtria, dënoi të premten gazetarin amerikan Danny Fenster me 11 vjet burg pasi e shpalli atë fajtor për disa akuza, duke përfshirë nxitjen e përhapjes së informacionit të rremë ose nxitës.
Fenster, redaktori ekzekutiv i revistës online Frontier Myanmar, u shpall gjithashtu fajtor për kontaktim me organizata të paligjshme dhe shkelje të rregullave të vizave, vuri në dukje avokati Than Zaw Aung.
Gazetari amerikan ndodhet në paraburgim që prej muajit maj dhe po përballet me dy akuza të tjera në një gjykatë tjetër: për shkelje të dyshuar të ligjit kundër terrorizmit dhe statutit për tradhti dhe rebelim.
Presion mbi mediat
Fenster u ndalua në aeroportin ndërkombëtar të Yangonit më 24 maj teksa po përgatitej të hipte në një aeroplan të nisur për në Detroit, SHBA. Ai është i vetmi gazetar i huaj i dënuar për një krim më të rëndë që kur ushtria e Mianmarit përmbysi qeverinë e zgjedhur të Aung San Suu Kyi në shkurt.
Sipas agjencisë AP, junta ushtarake ushtroi presion të fortë mbi mediat dhe lirinë e tyre të punës, duke mbyllur fjalë për fjalë të gjitha mediat opozitare dhe duke arrestuar rreth 100 gazetarë, 30 prej të cilëve janë ende në burg.
Disa nga mediat e mbyllura vazhdojnë të funksionojnë pa leje dhe publikojnë përmbajtje në internet, ndërsa punonjësit e tyre shmangin arrestimin. /tesheshi.com/
