Ilir Meta(j) paralajmëroi një padi ndaj Autoritetit të Dosjeve, gjë të cilën nuk e ka thënë deri tani, duke pretenduar se po manipulon me emrin e tij si ish-bashkëpunëtor i mundshëm i Sigurimit të Shtetit.
“Autoriteti i Dosjeve do të paditet për nxjerrje të sekreteve shtetërore, për falsifikime të qëllimshme të qytetarit. Më 1 shtator do të padis penalisht Autoritetin e Manipulimit të Dosjeve për shkelje flagrante të ligjit organik të dosjeve te sigurimit të shtetit, për manipulim për qëllim shantazhi dhe nxjerrje të sekretit shtetëror.
Unë jam njohur plotësisht me dosjen e përndjekjes së qytetarit F.T. nuk ekziston asnjë dosje për Ilir Rexhep Metajn. Këto përralla dhe lojëra nuk funksionojnë me Ilir Metën”, tha Meta, duke artikuluar dhe në këtë rast dy variante mbiemrin, Metaj dhe Meta.
Ndërkohë, kujtojmë se gruan në krye të Autoritetit të Dosjeve, Gentiana Sula, e ka emëruar vetë ai, Meta(j).
Më herët, kreu i grupit të PS-së, Taulant Balla potencoi nismën e re parlamentare, e cila synon të godasë ish-bashkëpunëtorë të Sigurimit të Shtetit
Bëhet fjalë për një paketë në fund të korrikut, në bazë të propozimit të ardhur nga Autoriteti i Informimit për Dosjet e Komunizmit. Janë propozuar dy ndryshime nga Partia Socialiste, njëri për funksionimin e Autoritetit dhe tjetri në Kodin Zgjedhor.
Për të hedhur dritë mbi çdo gjë, nisur nga rasti i evidentuar tashmë, për një politikan të nivelit të lartë që ka mbajtur poste të rëndësishme në Shqipëri, dhe Autoriteti ka arritur në konkluzionin që mbi këtë politikan kanë rezultuar dokumenta të reja shtesë, por ekzistojnë disa pengesa në ligjin aktual që bëjnë të pamundur zbardhjen e plotë. Jo vetëm për këtë politikan por edhe të tjerë.
Në Shqipëri, në këto 30 vite ka pasur edhe raste të tjera, nuk është vetëm ky. Kanë arritur të ngrihen në hierarkinë më të lartë të shtetit persona që kanë qenë bashkëpunëtorë të ish-sigurimit. Në këtë këndvështrim janë depozituar këto nisma”, sqaroi Balla. /tesheshi.com/
