Presidenti Meta e thëlloi dhe më tepër luftën e tij të kamufluar me SHBA, duke e bërë njëherësh dhe më të qartë atë. Një ditë pasi ambasadorja Yuri Kim u takua me ministren e Drejtësisë Etilda Gjonaj, e supersulmuar nga kreu i shtetit, ky e fundit e quajti këtë si “përkrahje ndaj një falsifikatoreje”.
“Nuk ndaloj askënd të rreshtohet në krahun e grupit falsifikator, kushdo qoftë brenda dhe jashtë vendit. Unë si president i Republikës, kam bërë çdo gjë që reforma në drejtësi të bazohet ashtu siç është në Kushtetutën e Shqipërisë”, tha Meta, që më pas e çoi fjalën te zëvëndësimi i Llallës me Markun në krye të Prokurorisë së Përgjithshme, e cila gjithashtu pati përkrahje amerikane.
“Se kush e ka minuar, kush ka përkrahur direkt apo tinëzisht miratimin e ligjeve antikushtetues, si në rastin e prokurorit që u zgjodh me 69 vota, kush ka bllokuar Këshillin e Emërimeve në Drejtësi për te vite, kjo është çështje tjetër dhe na ka dëmtuar shumë, por edhe se kush përpiqet të mbështesë këtë akt që unë me anë të fakteve dhe argumenteve të mia e kam cilësuar si përpjekjen finale për grusht shteti, të gjithë po e shohin shumë drejt”, tha Meta. /tesheshi.com/
