Dita e Europës i ka shërbyer presidentit të zgjedhur të vendit, Ilir Meta për të shpalosur edhe një herë filozofinë e tij të maturisë politike, për dialog dhe zgjidhje të përgjegjshme për krizën politike. Në një fjalim nga mjediset e Kuvendit, Meta parashtroi vizionin e tij se çfarë i nevojitet Shqipërisë, duke vendosur, siç tha, interesat e vendit dhe të ardhmen europiane si prioritet i axhendave politike.
“Asnjëherë nuk është vonë të gjejmë zgjidhjen e përgjegjshme. Nuk do të rresht kurrë përpjekjet e mia për dialog dhe kompromis”, tha Meta.
“E ardhmja i përket brezit të ri. Shpresat dhe ëndrrat e tyre në të ardhmen duhet të motivojnë e të rrisin peshën tonë politike e qytetare më shumë. Kuvendi ka detyrë të bëhet shembull për brezin e ri duke u kthyer në shtëpinë e demokracisë së vërtetë. Në këtë mënyrë do demonstrojmë se jemi në lartësinë e vlerave europianiste që populli shqiptar ka përqafuar që në dhjetor 1990. Dëshira ime në këtë ditë është që në Parlamentin e ri që do të krijohet, të rinjtë e të rejat kanë qenë dhe janë shembulli më i përkryer i pasionit të sinqertë për Shqipërinë e vërtetë evropiane”, tha Meta. /tesheshi.com/
