Janë betuar në Presidencë 8 prokurorët e SPAK-ut, duke i hapur rrugën kështu një prej instancave bazë të Reformës në Drejtësi, asaj që përflitet se ka provokuar dhe pështjellimet e rënda politike.
Menjëherë kanë reaguar BE dhe SHBA, me përfaqësuesit e tyre në Tiranë, duke shprehur entuziazmin e tyre për këtë zhvillim.
“Mirëpresim betimin e 8 prokurorëve të SPAK para presidentit. Tani ata janë gati të nisin punën. Një tjetër moment i rëndësishëm për zbatimin e Reformës në Drejtësi. Lufta kundër Korrupsionit dhe organizimit të krimit është përparësia kryesore për Shqipërisë dhe rrugën drejt anëtarësimit të BE-së”, shkruan ambasadori Soreca.
“Shtetet e Bashkuara përgëzojnë tetë prokurorët të cilët u betuan këtë mëngjes si anëtarët e parë të Zyrës së Prokurorisë së Posaçme, duke shënuar një hap të rëndësishëm në themelimin e Strukturës së Posaçme Anti-Korrupsion dhe Krim i Organizuar (SPAK).
Nga dita e sotme, Shqipëria ka një organ prokurorësh të angazhuar për të identifikuar, hetuar dhe vënë përpara drejtësisë zyrtarë të kaluar apo aktualë dhe bosë të krimit – individë që në kohët e vjetra janë konsideruar si të paprekshëm.
Ndërsa Shqipëria nis një fazë të re të zhvillimit të saj demokratik dhe ligjor, Shtetet e Bashkuara do të mbeten një partner i palëkundur në mbështetje të SPAK dhe të të gjithë atyre që kërkojnë ti japin fund pandëshkueshmërisë dhe të sjellin drejtësi për popullin shqiptar”, shkruan Amabasada Amerikane.
Por ka një problem që deri më tani nuk është cekur; më saktë ka një shkelje kushtetuese, që çuditërisht, Presidenti Meta që është vetëshpallur ithtar i saj deri me paralajmërime vetëflijuese, nuk ka bërë zë.
Kushtetuta cakton që SPAK përbëhet nga 10 prokurorë e jo 8 – neni 148, pika 2, ku thuhet literalisht se “Prokuroria e Posaçme përbëhet të paktën nga 10 prokurorë të cilët emërohen nga Këshilli i Lartë i Prokurorisë…”.
Ç’po ndodh pra, kur as nga Këshilli i Lartë i Prokurorisë nuk është komentuar ky rast, pra për 8 më vend të 10 siç e kërkon Kushtetuta?
Me gjasë, ngjan se ky përbën një test amerikan mbi Metën, nëse do refuzonte betimin në shkelje të Kushtetutës, që në këtë rast do ishte reagim i drejtë. Tashmë, deri në këtë moment, gjersa nuk është sqaruar ende se pse janë zgjedhur 8 e jo 10 prokurorë për SPAK-un, presidenti është në shkelje kushtetuese që ka pranuar të dekretojë dy më pak. /tesheshi.com/
