Ilir Meta sfidon socialistët edhe nga posti i presidentit. Një ditë pasi dorëzoi detyrën si kryetar i LSI-së, ai mori pjesë në mbledhjen e Komitetit Drejtues ku mbështeti Petrit Vasilin në detyrën e drejtimit të kësaj partie. Duke shfrytëzuar fjalimin e fundit kjo kjo foltore, Meta u kërkoi anëtarëve të LSI-së të mbështesin Vasilin, duke theksuar se Vasili mund të jetë edhe kryeministër.
“Orientimi i LSI drejt të ardhmes dhe në funksion të të rinjve është garancia që ju në këto zgjedhje edhe me kryetar Petrit Vasilin do të arrini një sukses të pamenduar. Ti japim një shans Petrit Vasilit të jetë njëshi i LSI apo jo?! Me përkrahjen tuaj mund të bëhet edhe njëshi i qeverisë. Nuk ndërhyj se kë caktoni ju për kandidat për kryeministër, është çështja juaj”, tha Meta.
Ilir Meta në mbledhjen e Komitetit Drejtues Kombëtar të LSI kërkoi nga opozita të rishikojë qëndrimet duke theksuar se ka ende kohë ti kthehet rrugës legjitime dhe të marrë pjesë në zgjedhje.
Nënkryetari Petrit Vasili zgjedhjen e Metës President e cilësoi sakrificë duke theksuar se vendimi u mor për hir të stabilitetit të vendit. /tesheshi.com/
