Presidenti Meta ka surprizuar sërish, kësaj here duke takuar të birin e Xhorxh Sorosit, mbi të cilin ka lëshuar “mallkime” në betejën kundër Reformës në Drejtësi, të cilësuar prej tij si Ramareformë. Sipas tij, e jo vetëm të tij në radhët e opozitës, reforma është punë e Sorosit për t’ia dhuruar drejtësinë Edi Ramës.
Por sa fundi, Meta gjen te Sorosi njeriun që duhet t’i ankohet për atë që sipas tij po ndodh me reformën.
“Presidenti Ilir Meta ka pritur sot në një takim me kërkesë të tyre Zëvendëspresidentin e Fondacionit “Shoqëria e Hapur”, z.Aleksandër Soros dhe Drejtorin Ekzekutiv të zyrës së Fondacionit në Shqipëri, z.Andi Dobrushi.
Meta i njohu me shqetësimet e Tij, të bëra edhe publike, për përpjekjet e qeverisë për kapjen e institucioneve të drejtësisë, e sidomos të Gjykatës Kushtetuese, për përkeqësimin e lirisë së medias, si dhe për domosdoshmërinë e gjallërimit të shoqërisë civile në mbrojtje të vlerave demokratike dhe të drejtave të njeriut”, njofton presidenca.
Kujtojmë se teoria konspirative se Reformën në Drejtësi e ka përgatitur Soros, nisën pak javë pas miratimit të saj, e nisjes së punës për implementim. /tesheshi.com/
