Presidenti Meta ka përcjellë një mesazh anti-Thaçi sa i përket tezës së korrigjimit të kufijve. Gjatë një fjalimi në qendër “Marshall” në Gjermani, Meta foli mbki situatën në rajon, dialogun Prishtinë – Beograd, marrëveshjen për të cilën flasin dy liderët respektivë Vuçiç e Thaçi, duke mbërritur te pika delikate e ndryshimit të kufijve.
“Dialogu mes të Kosovës dhe Serbisë, i udhëhequr nga BE-ja, po hyn në fazën e vet përfundimtare, në më të rëndësishmen dhe kritiken; Dhe, sipas mendimit tim, nevojiten vetëm përpjekje të bashkërenduara amerikane dhe europiane për ta çuar deri në fund këtë punë ende të papërfunduar, ose këtë fazë të rëndësishme konsolidimi në Ballkan.
Propozimi i fundit për një debat të ri mbi atë që do të përbënte marrëveshjen përfundimtare për normalizimin e marrëdhënieve midis Kosovës dhe Serbisë, po konsumon shumë energji për objektivat e gabuara. Ai as nuk e konsolidon dhe as nuk e paqton rajonin.
Hapja e një debati të tillë në një kohë kur janë ngritur flamujt e kuq sinjalizues e paralajmërues nga SHBA-ja dhe BE-ja për përfshirjen e aktorëve të tretë në rajon, e bën atë edhe më alarmues”, deklaroi Meta.
Edhe më herët, kreu i shtetit shqiptar ka dhënë sinjale se është kundër korrigjimit të kufijve. Kundër është shfaqur dhe Basha nga klasa politike e Tiranës, ndërsa Rama është shprehur se nuk ka kurajo që të shprehet për një çështje kaq delikate, duke bërë thirrje për një diskutim të tipit panshqiptar në këtë moment historik, sipas tij jo vetëm për Kosovën por dhe për kombin. /tesheshi.com/
