Presidenti Meta ka përcjellë të tjera deklarime “luftarake” me shënjestër mazhorancën, duke përdorur dhe termin “shpartallim”.
Me tezën e re, atë të një “grushti shteti” ndaj Kushtetutës, njeriu që mban postin e presidentit, paralajmëron nxjerrje dekretesh, ku nuhatet dhe ai më i paimagjinueshmi dhe aspak i mundur kushtetueshmërisht, i “i shpërndarjes së parlementit”.
Kjo lihet e nënkuptuar nga një reagim i tij për kreun e Komisionit të Ligjeve Ulsi Manja, i cili tha nga ana e tij se “diçka të tillë është absurde ta mendosh”.
“Parlamentin do e shpërndajë populli. Presidenti vetëm do zbatojë vullnetin e tij. Dhe dekretin për kthimin e ligjit për grushtin e shtetit do e vendosë populli. Presidenti vetëm do e firmosë në emër të tij. Do ketë disa dekrete për shpartallimin e grushtit të shtetit. Bëni durim! Dekretet do t’i zbatojë populli shqiptar”, shkruan zëdhënësi i tij Blushi, i cili gjithashtu postoi:
“Presidenti i Republikës Ilir Meta thirri sot në një takim Kryetarin e Partisë Demokratike, Lulzim Basha. Presidenti Meta e njohu Bashën me skandalet e fundit anti-kushtetuese dhe përpjekjet e Rilindjes për grusht shteti, dhe i kërkoi kryetarit të PD-së që të informonte edhe drejtuesit e partive të tjera opozitare. Presidenti Meta bëri të qartë se do të bëjë çdo gjë për të ndaluar dhe për të shpartalluar grushtin e shtetit, duke i dhënë përgjigjen më shembullore që meriton”. /tesheshi.com/
