Ka reaguar ambasada amerikane në Tiranë e gjihashtu Zyra e BE-së, lidhur me ftesën e bërë nga kryeparlamentari Meta, për t’u takuar të gjitha palët aty, në kryesinë e Kuvendit, për të arritur një konsensus për reformën në drejtësi, para së enjtes kur do votohet, e që me gjasë, sipas zhvillimeve të deritanishme, do të rrëzohet.
“Më 10 korrik, si qeveria ashtu edhe opozita u angazhuan përpara Ambasadores Nuland se negociatat e ardhshme do të bazoheshin vetëm mbi propozimin hibrid, i cili vë në zbatim plotësisht paragrafin 88 të Komisionit të Venecias dhe ka mbështetjen e OPDAT dhe EURALIUS”, thuhet në reagimin e Ambasadës së SHBA-ve.
Ndërsa, në deklaratën e delegacionit të BE-së thuhet se ambasadorja është e gatshme të ofrojë pikëpamjet e Bashkimit Europian rreth propozimit dhe përputhshmërisë së plotë të rolit të parashikuar për operacionin ndërkombëtar të monitorimit me opinionin e Komisionit të Venecias, si edhe me qëndrimin afatgjatë të BE-së dhe SHBA-ve se i gjithë pushteti vendimmarrës duhet të qëndrojë me autoritetet shqiptare.
Tashmë, pritet nëse propozimi i Metës do të bëhet realitet. Me fjalimin e sotëm, ndër më të rrallët e të pazakontët e Metës si politikan, kreu i LSI-së dhe njëherësh kreu i Kuvendit, po tenton faktorizimin tij në zhvillimet për reformën në drejtësi. Sipas tij, çështja mund të zgjidhet vetëm nëse aty, në kryesinë e Kuvendit, takohen kokë më kokë, ai me dy krerët e partive, Rama e Basha, Lu e Vllahutin. /tesheshi.com/
