Gjatë vizitës së tij në Izrael, ku si shkak qe përkujtimi i Holokaustit, presidenti Meta u rezervua të sulmojë kryeministrin Rama në rastin e komentimit të negociatave, më saktë mos’hapjen e tyre, ndryshe nga herë të tjera të ngjashme.
Meta nuk fajësoi qeverinë por adresoi si shkak metodologjinë e rishikuar të Macronit.
“Është e vërtetë që Presidenti Macron ka kërkuar të rishikojë metodologjinë e zgjerimit të BE-së, dhe shpresojmë që kjo metodologji të rishqyrtohet shumë shpejt. Unë fola me të nëntorin e kaluar kur isha në Paris. Ne jemi në kontakt me BE-në dhe shpresojmë që së shpejti do t’i hapë rrugë vendimeve pozitive për Shqipërinë dhe Maqedoninë e Veriut”, tha Meta.
Më tej, referuar raporteve mes Shqipërisë dhe Izraelit, Meta tha “hebrenjtë ishin ndër intelektualët më të mirë të Shqipërisë”, ndonëse sipas tij ata urreheshin nga Enver Hoxha gjatë regjimit komunist.
“Megjithë retorikën e regjimit komunist kundër Izraelit gjatë asaj kohe, populli hebre në Shqipëri ishte shumë i respektuar dhe i integruar mirë në vendin tonë. Një nga mësuesit e mi më të mirë, Marlena Dojaka, ishte hebreje, dhe ne jemi akoma në kontakt. Hebrenjtë ishin ndër intelektualët më të mirë të Shqipërisë”,tha Meta për The Times of Israel.
Sipas Metës, për Izraelin ekziston një vlerësim dhe në Kosovë, ndaj shteti hebre duhet ta njohë atë. “Kosova dhe Izraeli kanë një miqësi të madhe. Ne dëshirojmë dhe shpresojmë që Izraeli ta njohë pavarësinë e Kosovës sa më shpejt të jetë e mundur. Unë nuk mund të flas në emër të secilit vend, por ka simpati të madhe midis kosovarëve për hebrenjtë, dhe anasjelltas. Shpresoj se do të vijë koha. Deri atëherë, të gjitha mundësitë për bashkëpunim dhe zhvillim dypalësh duhet të shfrytëzohen”, tha kreu i shtetit shqiptar. /tesheshi.com/
