Kryeparlamentari Ilir Meta, i “merr” gjysmën e axhendës shefes së diplomacisë së BE-së, Federica Mogherini.
I “tharë” prej kohësh nga ndonjë takim i nivelit të lartë ndërkombëtar në Tiranë, kryeparlamentari devijon lëvizjen e Mogherinit, së cilës iu desh të shkonte edhe në zyrën e Ilir Metës tek Kryesia e Kuvendit, por edhe tek salla e seancave plenare ku mbajti fjalën para deputetëve.
Si asnjëherë më parë, axhenda është kërkuar siç duket nga vetë stafi i Ilir Metës. Zakonisht personalitetet që mbajnë fjalë në Parlament takohen me Kreun e Kuvendit vetëm në sallën e seancave, por sot ka ndodhur ndryshe.
Madje, media pranë LSI-së janë kujdesur të hapin lajmin se axhenda e Mogherinit fillon me Metën.
Më pas, Përfaqësuesja e Lartë për Politikë të Jashtme dhe Siguri në BE, ka mbajtur fjalën para deputetëve.
Në mënyrë të prerë, politikanja italiane që drejton diplomacinë e Brukselit tha se do të hapen negociatat për anëtarësimin e Shqipërisë në BE, vetëm kur të miratohet reforma në drejtësi.
“Ne e dimë që duhet reformë e thellë tërësore dhe gjyqësore. Nuk duhet të harrojmë se përse është kjo reforma në gjyqësor. Kjo refomë do t’i hapë rrugën për rekomandim nga KE për të nisur negociatat që vendet anëtare të marrin një vendim për këtë çështjen. Duke u bazuar tek “Venecia” bëni gjënë e duhur, miratojeni atë. Bëni reformën në drejtësi”, tha Mogherini.
Ndërkaq duke iu drejtuar deputetëve ajo u ka kërkuar të heqin dorë nga e shkuara.
“Sugjerimi im për ju është çlirohuni nga ajo pjesë e së shkuarës dhe çojeni këtë vend përpara, silleni Shqipërinë në BE. Këtë detyrim ia keni Shqipërisë, më lejoni t’ju them se kështu i detyroheni të gjithë Europës”, tha Mogherini para deputetëve.
Kjo frazë e saj, mund të përkthehet dhe si një mesazh ndaj deputetëve të së djathtës, që mos e kenë më referencë stilin politik të Berishës.
Përgatiti: Ylli Pata – /tesheshi.com/
