Presidenca e ka bërë më të qartë atë e cila kanë dhënë shenja gjithë këto kohë e që dha në protestën e allasojshme të së martës, ku kreu i shtetit doli në rrugë edhe në emër të sovranitetit: luftën me SHBA që ka thelb papajtueshmërinë me Reformën në Drejtësi.
Ndërkohë që ambasadorët e SHBA dhe BE, Kim dhe Soreca, ofronin mesazhe mbështetëse për prokurorët në një konferencë me titull “Sfidat e Prokurorisë së Përgjithshme në Dritën e Reformës në Drejtësi”, nga Presidenca përcillet një mesazh gjuhëlëshuar, ku në adresë të përfaqësuesve ndërkombëtarë, përdoret dhe etiketimi “pafytyrësi”.
“Tallja me Reformën në Drejtësi dhe bërja e ligjeve puçiste anti-kushtetuese pati meritë të madhe për të mbledhur kaq shumë shqiptarë kundër grushtit të shtetit, ku Ministrja e Drejtësisë, siç është provuar nga shkresat zyrtare, akuzohet për 4 vepra penale”, shkruan zëdhënësi i Metës, Tedi Blushi.
Pos që përcjell bindjen se ministrja Gjonaj ka bërë shkelje kushtetuese, për të cilën Meta e ka çuar në SPAK, “gjuha” e presidentit e cilëson konferecën si “kryemaskaradë”.
“Ndërsa të gjithë prisnin që Prokuroria të vepronte ndaj saj, sot e shohin si pjesë të frontit të Ramaformës në konferencën e Prokurorisë duke qenë edhe krenare! Pandëshkueshmëria, Padrejtësia dhe Pafytyrësia kanë arritur majat! Herën tjetër do mblidhen shumë herë më shumë se dje, shqiptarë të ndershëm dhe me dinjitet, që s’mund të pranojnë këtë Kryemaskaradë! TURP! SHAME ON YOU!”, është mesazhi i dalë nga Presidenca, posaçërisht kundrejt ndërkombëtarëve që mbështesin Reformën në Drejtësi, të cilët janë quajtur gjithashtu dhe “organizatë mafioze” nga ana e kreut të shtetit.
Tashmë është e qartë një luftë mes Metës nga njëra anë e SHBA-BE nga ana tjetër, ku i pari ka kërcënuar të dytët deri me pushtim të parlamentit në datën 15 mars.
Kjo situatë i shkon për shtat asaj që Meta deklaroi më shumë se një vit më parë, se ishte gati të vetëflijohej në Presidencë, porsi Salvador Alejnde në Kilin e dekadave më parë. /tesheshi.com/
