Mësuesia mund të jetë profesioni i ëndrrave për shumë njerëz. Fundja, ç’mund të ketë më të bukur dhe interesante sesa të mësosh një grup fëmijësh të etur për dije?!
Por për fat të keq, ushtrimi i këtij profesioni nuk është aq i lehtë sa ç’duket në ditët e sotme. Kjo për shkak se fondet që jepen për arsimin kanë pësuar rënie të konsidueshme në shkallë globale, por edhe sepse fëmijët po bëhen gjithnjë e më të padisiplinuar.
Një rast konkret që ngre pikëpyetje për realitetin e edukimit, i ka ndodhur këto ditë mësueses së klasës së gjashtë të shkollës Cedar Creek në Teksas, e cila ka dhënë dorëheqjen për shkak të sjelljes së nxënësve të saj, si dhe pretendimeve të prindërve. Në një postim në Facebook, që pati një përhapje marramendëse në vetëm pak orë, Julie Marburger shkroi se do ta linte punën në fund të vitit shkollor dhe u shpreh se ndihej e keqardhur që prindërit ia kishin pamundësuar misionin e saj.
Në këtë postim, ajo përshkruan me detaje një ngjarje të pakëndshme që i kishte ndodhur me një nga prindërit dhe shprehet e zhgënjyer që nuk kishte gjetur as mbështetjen e Drejtorisë së shkollës. Ndër të tjera, mësuesja thotë:
“E di që shumë vetë do të thonë se nuk duhet të publikoj të tilla gjëra në rrjete sociale, e se duhet të promovoj edukimin e të them fjalë të mira, por sinqerisht që nuk e vras më mendjen! Pas kësaj ngjarjeje, më është shuar krejt pasioni që kisha për këtë profesion. Ndoshta rasti im mund të shërbejë për t’ju ndërgjegjësuar. Nuk mund të vazhdohet më kështu!”
Fjalëve të saj në Facebook, Marburger u ka bashkëngjitur edhe disa foto të klasës, ku ajo mbante sendet personale, të cilat ia kishin dëmtuar nxënësit.
Postimi në fjalë është shpërndarë mbi 400,000 herë dhe është shoqëruar me komente të shumta, ku njerëzit solidarizohen me mësuesen dhe tregojnë ngjarje të ngjashme nga jeta e tyre. /tesheshi.com/
