Në korrik të vitit të shkuar, argjentinasit do të humbnin me 11-metërsha në finalen e Kupës së Amerikës pikërisht ndaj kilianëve. Dhe shpagimi nuk ka vonuar të vijë, teksa Argjentina ka fituar 1-2 në Santiago, në një ndeshje të luajtur për eliminatoret e Botërorit të 2018-ës.
Edhe pse nuk ka shënuar, Messi ka qenë frymëzues për Argjentinën në pjesëmarrjen e tij të parë në këto eliminatore, pasi ka munguar në katër takimet e tjera për arsye dëmtimi.
Kilianët ushtruan presion në ndeshjen e zhvilluar me të hyrë e premtja. Ata e gjetën golin që në minutën e 11-të, kur Gutierrez tundi rrjetën kundërshtare. Të zgjuar, argjentinasit reagojnë menjëherë, dhe barazojnë shpejt e kalojnë po shpejt në epërsi. Di Maria shënoi në minutën e 20-të, e pesë minuta më pas erdhi dhe goli i fitores për Argjentinën, i shënuar nga Mercado.
Edhe pse pati përpjekje më pas nga të dyja palët, rezultati 1-2 nuk ndryshoi, duke i bërë fitues argjentinasit. Me këtë fitore, Argjentina ngjitet në vendin e katërt mes dhjetë skuadrave, me po aq pikë sa Paraguaji i vendit të tretë.
Në tre sfidat e tjera, Bolivia humbi 2-3 me Kolumbinë, Ekuadori barazoi 2-2 me Paraguajin, dhe po 2-2 përfundoi dhe ballafaqimi Peru – Venezuelë.
Në 01:45 të së shtunës do të luhet supersfida Brazil – Uruguaj.
Nga grupi me dhjetë skuadra i Amerikës Latine, për në botëror kualifikohen automatikisht katër kombëtaret e para, ndërsa e pesta luan dy ndeshje të tjera eliminatore ndaj një kundërshtari ndërkontinental. /tesheshi.com/
