Pas rezultatit tenistik të Brazilit ndaj Haitit, ka qenë radha e Argjentinës që në orët e para të së shtunës të bëjë të njëjtën gjë ndaj Panamasë.
Kupa e Amerikës vijon me ndeshjet në grupe, e këtë të shtunë janë mbyllur sfidat e dyta.
Në grupin D, Argjentina ka fituar thellë ndaj Panamasë, duke siguruar kalimin në çerekfinale. Në stadiumin “Soldier Field” të Çikagos, të mbushur plot, e të mbizotëruar nga bluzat e Argjentinës, është parë një ndeshje e ekuilibruar gjer në gjysmëorëshin e fundit të lojës.
Otamendi do të shënonte në minutën e 7-të për Argjentinën, por loja do të ishte mjaft e ekuilibruar, me mjaft raste për panamezët.
E kjo do të vijonte gjer në minutën e 61-të, kur Lionel Messi hyn në fushë. Debutimi i “pleshtit” në këtë Kupë të Amerikës.
Dhe këtu mbaron historia për panamezët, që vuajnë shkëlqimin e Messi-t. Tre gola të shënuar nga ylli i Barcelonës, me të dytin e tij, e të tretin për Argjentinën, si më spektakolarin. Një goditje dënimi e ekzekutuar mjeshtërisht nga Messi.
Në fund të lojës vjen dhe një gol i shënuar nga Aguero. Argjentina fiton 5-0, e kualifikohet për në çerekfinalet e Kupës së Amerikës.
Në takimin e mëhershëm, po për të njëjtin grup, Kili fitoi 2-1 me Bolivinë. Arturo Vidal qe heroi i kilianëve, që golin e dytë e shënoi me 11-metërsh kur ndeshja e rregullt kishte minuta të tëra që kishte mbaruar. Të pafat bolivianët, që deri atëherë i gëzoheshin barazimit, pas golit të Campos-it në minutën e 61-të.
Me nga tre pikë, Kili e Panamaja do ta përcaktojnë në ndeshjen mes tyre të mërkurën se cila do të jetë skuadra e dytë e grupit D. /tesheshi.com/
