Përplasja më e fundit “fatale” ndërmjet dy aleatëve kryesorë në qeveri është pjesë e një beteje apo “pazari” i pa arritur n ë kuadër të reformës në drejtësi.
I gjithë shantazhi dhe presioni që palët po i bëjnë njëra-tjetrës dy javët e fundit, ka një çkodim që vjen edhe nga burime diplomatike, të cilat kanë arritur të kuptojnë arsyen e gjithë kësaj zallamahie.
E gjitha përmblidhet në një emër: Nasip Naço.
Ish-ministri i Drejtësisë, i lënë “në stolin e rezervave” nga Ilir Meta, është projektuar si kandidaturë kryesore për Kryeprokuror të Republikës nga ky i fundit pas miratimit të reformës në drejtësi.
Por Rama mësohet se ka qenë kundër një pazari të tillë.
Kreu i LSI-së, duke e parë që ka gjetur një mur në këtë post, ka propozuar dhe insistuar që ish-ministri i tij dhe deputet i Skraparit, të emërohet ose kreu i Byrosë Kombëtare të Hetimit ose Kreu i Prokurorisë Speciale (SPAK), e cila do të merret me arrestimin e zyrtarëve të korruptuar.
Siç mësohet, edhe në këtë rast Edi Rama ka qenë kundër dhe i ka kërkuar partnerit të tij të mos bëjë presion, pasi sipas kryeministrit, një ndarje e tillë mund të bëhet me “tortën e pushtetit qeverisës”, pra me vendet e punës në administratë dhe jo me drejtësinë.
Argumenti i kreut të mazhorancës ka qenë se emërimi i krerëve të institucioneve të drejtësisë pas reformës do të jetë pjesë e një skeme tjetër, e cila nuk duhet dhe do të kalojë nga politika.
Por kreu i LSI-së ka insistuar që mazhoranca, në këtë kuadër të mbështesë dhe lobojë që ish-ministri Naço të marrë një nga postet më të rëndësishme që do të ketë organizmi i ri sistemit të drejtësisë pas miratimit të reformës.
LSI-ja me 20 deputetët e saj është jetike për miratimin e ndryshimeve kushtetuese. Por Edi Rama nuk ka pranuar dhe i ka kërkuar partnerit që të mos bëjë shantazh.
Kjo situatë ka sjellë një moskomunikim të gjatë dhe një përplasje të fuqishme që sollën skandalet, sidomos dhe “Xhelili”-n.
Sekretari i Përgjithshëm i LSI-së, Luan Rama, ka bërë të ditur në një intervistë televizive ditën e djeshme, se reforma e drejtësisë “nuk duhet të bëhet kundër një pale”.
Pikërisht kjo ka qenë skema e Metës për të argumentuar propozimin e tij. Pra që emërimi i Naços si kreu i SPAK apo BKH mund të sjellë një qetësi tek opozita, e cila do të votojë reformën.
Dhe siç bëhet me dije, nga një pjesë e Partisë Demokratike, pikërisht ish-ministrat që u përplasën me ambasadorët Lu-Vllahutin, janë dakord për emërimin e ish-kolegut të tyre në kabinetin “Berisha” si një nga postet kyçe të reformës.
Dita e nesërme kur sipas planit është parashikuar të zhvillohet takimi Rama-Meta, do të jetë vendimtare në zgjidhjen e kësaj “nyje të re gordiane” mes një koalicioni që më shumë shërben si grup antagonist presioni sesa si një ekip qeverisës.
Përgatiti: Ylli Pata /tesheshi.com/
