Kancelarja gjermane Angela Merkel ka thënë se shpreson të fillojë negociatat mbi pranimin e Maqedonisë Veriore dhe Shqipërisë në Bashkimin Evropian përpara përfundimit të presidencës gjermane të Këshillit Evropian në dhjetor.
“Shpresoj se do të jetë akoma e mundur të organizohet një konferencë pranimi nën kryesinë tonë,” tha ajo në një fjalim në internet gjatë samitit video të Procesit të Berlinit, të organizuar nga Bullgaria.
Kancelarja tha se qëllimi i procesit të Berlinit është të punojë në “pajtimin” dhe “tejkalimin e tensioneve historike”.
“Pajtohem. Kjo është shumë e rëndësishme,” shtoi ajo gjatë një takimi të bashkë-kryesuar nga Bullgaria dhe Maqedonia Veriore, vende që nuk kanë arritur ende të zgjidhin mosmarrëveshjet e tyre.
Bashkëpunim në interes të të gjithëve
Edhe ministri i Jashtëm gjerman Heiko Maas shprehu shpresë për një fillim të shpejtë të bisedimeve të pranimit me Shkupin dhe Tiranën.
“Një nga qëllimet e presidencës sonë të BE është të përmirësojë procesin e zgjerimit dhe ne kemi ndërmend ta bëjmë atë në ditët dhe javët e ardhshme,” tha Maas.
Ndërsa presidenti francez Emmanuel Macron tha se Ballkani Perëndimor duhet të përfshihet në luftën kundër terrorizmit, referuar faktit se atentatori i Vjenës kishte origjinë shqiptare dhe ishte nga MaqedoniaVeriore, ndonëse mbante shtetësi austriake dhe jetonte në Austri.
“Ndërsa rreziku rritet, si brenda BE ashtu edhe në rajonin e Ballkanit, bashkëpunimi i zgjeruar do të jetë padyshim në interesin e të gjithë neve,” theksoi ai.
Macron mori pjesë në mini-samitin në internet të BE-së për kundër-terrorizmin të martën pas sulmeve të fundit në Francë dhe Austri. /tesheshi.com/
