Kryeministri Edi Rama i është rikthyer me tone të zbutura çeshtjes së Himarës, ku u akuzua nga shteti grek se po shembte ndërtimet e minoritarëve. Gjatë ndarjes së tapive dhe legalizimeve për banorët e Konispolit, kryeministri tha se çeshtje të tilla ndikohen nga politika, duke dëmtuar bashkëjetesën e hershme mes shqiptarëve dhe minoritetit grek.
“Për arsye vetëm politike, të lidhura me interesa partiake, ngrihen hera-herës dallgë krejtësisht të panevojshme, në mënyrë artificiale, për t’i fryrë një zjarri, por nuk ka asnjë shans të ndizet aty ku shqiptarët dhe minoritarët bashkëjetojnë si vëllezër, si fqinjë, prej kohësh të largëta dhe do të bashkëjetojnë gjithmonë së bashku. Kjo është në themelet e këtyre komuniteteve dhe nuk i prek dot politika, sado dinakërisht të përdori situata krejtësisht pa lidhje me qasjen tonë ndaj minoritetit, siç është situata e disa ndërtimeve pa leje në Himarë, pa asnjë lloj lidhjeje”, u shpreh Rama.
Kryeministri tha se qeveria aktuale u jep të drejta të barabarta minoritarëve, me prova konkrete.
“Të gjithë ata që bëjnë zhurmë të madhe në Tiranë apo gjetkë për të drejtën e pronës së minoritarëve në Shqipëri, ja ku e kanë një shembull kuptimplotë sesi respektohet maksimalisht dhe në mënyrë tërësisht të barabartë çdo qytetar, qoftë me kombësi shqiptare, qoftë me kombësi greke”, pohoi Rama, teksa ndante 105 çertifikatat e legalizimit dhe titujve të pronësisë në Konispol./tesheshi.com/
