Papa Françesku i ka kushtuar një hapësirë të posaçme medias në mesazhin e tij të fundit të vitit. Ai u ka këshilluar mjeteve të informimit të fokusohen më shumë te lajmet e mira, pozitive, që përcjellin optimizëm.
Media duhet t’u japë më shumë hapësirë lajmeve pozitive, frymëzuese, për të kundërpeshuar epërsinë e së keqes, dhunës dhe urrejtjes në botë, ka thënë mes të tjerash ai në mesazhin e tij.
Ai e ka përshkruar vitin e lënë pas si të mbizotëruar nga dhuna, vuajtjet, vdekjet, nga refugjatët, nga burrat, gratë e fëmijët pa shtëpi, pa ushqim e pa mjete mbështetjeje.
Megjithatë, ka nënvizuar Papa Françesku, ka patur shumë gjeste mirësie për t’i ndihmuar nevojtarët, “edhe nëse nuk janë në programet e lajmeve televizive, sepse gjërat e mira nuk përbëjnë lajm”.
Media nuk duhet të lejojë që gjeste të tilla solidariteti të eklipsohen nga arroganca e së keqes, ka sugjeruar kreu i Kishës Katolike. /tesheshi.com/
