Meri Nikollova është një gazetare e njohur maqedonase. Por më të njohur e kanë bërë disa angazhime politike, si dhe zgjedhja për ta patur shqiptar shokun e jetës. E karakterizon një lloj rebelizmi që është më tepër kundërvënie ndaj hipokrizisë, sidomos asaj politike, por dhe asaj shoqërore, kur është fjala për kontekste etnike. Në një prononcim të shkurtër për portalin ‘tesheshi.com’, ajo flet për të gjitha këto, shkurt dhe…maqedonisht (por sigurisht e përkthyer në shqip)
Ç`duhet bërë që Maqedonia të ekzistojë dhe të jetë një vend normal?
Faktori ndërkombëtar e ka bërë të qartë se nuk ka më ndryshim të kufijve në Ballkan. Shumica e shteteve të Ballkanit janë pjesë tashmë e NATO-s e cila ka përgjegjësinë t`i mbrojë në rast agresioni; pra askush të mos tentojë t`i sulmoj linjat kufitare. Fqinjët tanë, të gjithë e njohin integritetin territorial të shtetit tonë në kufijtë egzistues. Është e qartë se jemi të “dënuar “ të jetojmë bashkë dhe së këndejmi secili që do të rebelohet për ndryshim kufijsh. Kush e do sinqerisht popullin e vet do të punojë për përmisimin e standrtit jetësor me përkushtim, që të dalë nga kjo varfëri që na ka katandisur keq e më keq.
Eshtë zgjedhja jonë: a do të vazhdojmë me rrëfime nacionaliste dhe të përfundojmë si më keq si rasti i Ruandës – mos e dhashtë Zoti! – apo do t`i shkrijmë talentet tona (shqiptarë, maqedonas, turq, serbë romë, etj) dhe të bëjmë atë që bënë zviceranët me origjinë nga Gjermania, Italia dhe Franca. Për këtë duhet të jemi të lirë, pjesë e BE-së, dhe me atë të barabartë në çdo pikëpamje.
Mbas ndodhive të fundit, a do t`ja dalim mbase të jemi edhe më të fortë?
Me forcimin më të madh të kapaciteteve qytetare, bashkimin e të gjithëve pa dallim etnike, ashtu siç na dhanë shembull studentët, mundësia që t`ja dalim është e madhe, edhe me bindjen se do e kemi mbështetës të fuqishëm faktorin ndërkombëtar. Unë vlerësoj se jo-masiviteti i protestës së BESA-s, (në fakt ishte masive, por vetëm me shqiptarë!), dëshmoi se qëndrimet e pastra etnike nuk kanë më perspektivë në Maqedoni. Edhe Kumanova e dëshmoi fuqimisht këtë.
Kjo frymë bashkëjetese dhe uniteti që ju përçoni në qasjet tuaja, duket sikur është në sinkron dhe me një zgjedhje private: shokun e jetës që e keni shqiptar, Agron Buxhakun, ambasadorin e Maqedonisë në Francë….
Maqedonia është e mbushur me tabu. Dhe unë dua t`i thyej të gjitha tabutë, sidomos ato që na bëhen pengesë për një jetë normale që ka në thelb harmoninë e të ndryshmeve, pa të cilën ky vend e ky shtet nuk do të ekzistonte.
Por desha të cek diçka tjetër në këtë mes, më shumë se sociale, një detaj privat: përfoljet e shumta se Meri Nikollova është dashnorja e ambasadorit të Maqedonisë në Francë, Agron Buxhaku!!!
Dhe më këtë rast, unë dua t`u përgjigjem të gjithëve atyre që ma kanë deformuar statusin tim përballë Agronit: Jo! Meri është gruaja e Agronit dhe ka dy fëmijë të mrekullueshëm; dhe të gjithëve ua dëshiroj të kenë një fat të tillë.
Po a thua vallë kurorëzimet e përziera janë pengesë për një Maqedoni më të mirë?!
Të zgjerohem pak: Unë me Agronin kam lidhje 12-jecare . Po Lubomir Danailov Ferçkovski a nuk ishte i martuar me shqiptare, të njëjtin Fërçkovski që e votuam për president të Shtetit në vitin 2009?! Po çka ishte kurorëzimi i profesoreshës së respektuar, Karolina Ristova Asterud, më nënshtetas të huaj, a ju pengoi ajo?! A po u pengon martesa e gazetarit të respektuar Borjan Jvanovski me aktoren e shkëlqyer Armenis Nokshiqi?! Po Nora Shaqiri me Marko Markoviç?! Po martesa e gazetares Snezhana Lepeska-Soyzan me producentin Erxhan Sozan?! Epo nga njëra anë shpreheni se jeni për një shoqëri multikulturore, kurse nga ana tjeter më gjykoni mua!
Pak a shumë kjo ishte deklarata që iu drejtova miqve të partisë Social-Demokrate të cilët udhëhoqën një fushatë kundër meje.
Krahas paragjykimeve me karakter etnik dhe politik, juve u kanë pagëzuar dhe me epitetin “zena borec” – gruaja luftëtare”…
Sa për të parën: unë asnjëherë nuk e kam mohuar se kam qenë në listën për deputete të partisë VMRO, por a nuk u bashkuan në një tubim ish-kryeministri nga radhët e LSDM- (partia opozitare Lidhja Social-Demokratike), Branko Cërvenkovski me ish-kryeministrin nga VMRO- Ljubço Gjeorgjievski?! Se kuptoj, pse më gjykojnë mua?!
E sa për të dytën: në shtetin tonë ka shumë probleme të detektuara: ka drejtësi selektive, pra një mosrespekt për drejtësinë; administratë të partizuar, borxhe, varfëri, korruptim material e moral, e shumë e shumë probleme te tjera të ngjashme. Në rrafshin profesional mund të them se është e penguar investigimi për vdekjen tragjike të kolegut tonë, gazetarit Nikolla Mlladenov, dhe në këtë situatë vështirë mos jesh një grua luftëtare.
Bisedoi: Memedali Jusufi – tesheshi.com
