Nga Blendi Gashi
Stërmbushja e administratës publike me militantë të partive ka ca vite që është një shqetësim, ku Komisioni Evropian në raportet e Progresit për Kosovën ka kërkuar të bëhen reforma, pasi vlerëson se administrata nuk përmbush standarde dhe është e mbingarkuar.
Dhe pikërisht kjo çështje ka ngjallur një luftë tashmë mes dy koalicioneve parazgjedhore, konkretisht AAK-së dhe LDK-së, të cilat në një mënyrë apo tjetër po mundohen të fitojnë vota.
E gjitha ka nisur pas deklarimit të bërë nga kandidati i koalicionit PDK, AAK, NISMA, Ramush Haradinaj, dje në Rahovec, i cili në një mënyrë kërcënoi punëtorët e administratës ku tha se synon të ndërtojë një administratë që do të jetë llogaridhënëse, përgjegjëse, efektive – një motor organizativ në shërbim të qytetarëve dhe shtetit.
“Do të zbraz tërë administratën shtetërore dhe do të sjell njerëz adekuat për të punuar në shërbim të qytetarëve. Nuk mundemi me mbajt peng vendin tonë në emër të çfarëdo burokracie. Por nuk mundem me e marrë këtë vend në qafë me ata që nuk e kryejnë punën e vet. Të gjitha procedurat të gjitha shërbimet ose kanë me u kry me kohë dhe në kualitet o kanë me shku në shtëpi”, ka thënë Haradinaj, por ka shtuar se askush s’do të largohet nga puna për shkak të bindjeve politike, ideologjike apo përkatësive tjera.
Këtë deklarim të tij, LDK-ja e ka cilësuar si shantazh dhe kërcënim ndaj administratës publike.
LDK, përmes një reagimi dërguar mediave, ka thënë se nëse triumfojnë në zgjedhjet e 11 qershorit, do t’ia pamundësojë koalicionit të territ që t’i shantazhojë dhe t’i largojë nga puna punëtorët profesionalë të administratës, me synim që ta mbush atë me mbështetësit e tij.
“LDK ka plan konkret për reformë moderne në administratë dhe jo për largim me dhunë të njerëzve nga vendet e punës siç ndodh në vendet diktatoriale, forma që po propagandohen nga kandidati i koalicionit të territ, i cili, siç e ka humbur arsyen, do të humb edhe në zgjedhjet e 11 qershorit”, ka thënë LDK në këtë reagim.
Por ky reagim aspak nuk i ka pëlqyer Haradinajt, i cili sot në një konferencë për media ku preznatoj si aderim të ri gazetarin Asllan Bajrami, i është kundërpërgjigjur LDK-së duke insistuar se të gjithë papunëtorët që nuk kryejnë në mënyrën e duhur shërbimet për qytetarët do të largohen nga puna.
“Kam bashkëqeverisur dikur me LDK-në ata më njohin mirë, më kanë besuar realisht me udhëheq Qeverinë e vendit dhe janë krenuar me logjikat qeverisëse. Nuk ka dalë kurrkush prej pune prej Haradinajt për çfarëdo përkatësie, çfarëdo natyre, por nuk mundem me marr në qafë një vend me ata që s’e kryejnë punën e vet. Pra, administrata nuk është për shkak të administratës por është për shkak të qytetarëve, të popullit. Nëse dikush nuk iu del përballë me shërbime në mënyrën e duhur qytetarëve kuptohet që del nga puna. Nëse dikush ka problem me këtë punë e madhe. Pra, ne nuk mundemi me mbajt peng vendin tonë përjetësisht në emër të çfarëdo burokracie. Të gjitha procedurat, të gjitha shërbimet ose kanë me u krye në kohë dhe në kualitet si i takon, ose kanë me shkuar në shtëpi”, ka thënë Haradinaj.
Ndryshe, një hulumtim i publikuar në vitin 2015-të nga Instituti për Studime të Avancuara “GAP”, thuhet se sektori publik në nivel qendror dhe lokal, numëron mbi 91 mijë të punësuar.
Në raport po ashtu thuhet se qeveria e Kosovës, duhet të fillojë me reformimin e administratës publike e cila mund të zbatohet përmes pensionimit të rregullt të tyre pas moshës 65 vjeçare dhe të mos punësojë shërbyes civil të tjerë, por pozitat e lira të mbulohen me stafin aktual.
Kujtojmë se paga mesatare në administratën shtetërore arrin në 429 euro, ndërsa në sektorin privat 349 euro. /tesheshi.com/
