Presidenti turk ka përcjellë përmes televizionit mesazhin e fundvitit, ku ka nënvizuar se Turqia po hyn në vitin e ri me pritshmëri e shpresa të reja.
“Në dashtë Zoti, në 2017-n ne do të jemi fitues ndaj organizatave terroriste dhe kemi për të arritur suksese edhe më të mëdha ekonomike.”
Erdogani nuk ka lënë pa prekur në mesazhin e tij zhvillimet e fundit në vend, duke nënvizuar, “Turqia po bën kohët e fundit një luftë të re për pavarësi. Uniteti ynë kombëtar, territori ynë, institucionet tona, ekonomia jonë, politika jonë e jashtme, të gjitha elementet që na mbajnë të qëndrojmë si një shtet janë nën një sulm të madh.”
“Përpjekja për grusht shteti e 15 korrikut shënoi pa dyshim aktin më të ulët terrorist dhe një përpjekje për pushtim… Turqia, me 79 milionë banorët e saj, ia doli ta kthejë këtë katastrofë në një fillim të ri dhe në një rezistencë të re me qëndrimin e palëkundur kundër përpjekjes për grusht shteti.”
“Jo vetëm vendi ynë, por gjithashtu rajoni ynë dhe bota po provojnë dhimbjet e hyrjes në një epokë të re,” ka theksuar Rexhep Tajjip Erdogan. “Nëse e kalojmë në mënyrë të fuqishme këtë periudhë tranzicioni, ne mund të vazhdojmë të bëjmë përpara drejt ambicieve tona; një e ardhme e ndritur na pret.”
Ai ka kujtuar se lufta kundër FETÖ-s, organizatës terroriste gyleniste, është e gjatë, e se kërkon vëmendje absolute.
Në fjalën e tij ka zënë vend dhe zhvillimi ekonomik i Turqisë, si një prej vendeve të para në botë në përqindjen e rritjes.
Në fund, Erdogani ka uruar që 2017-ta të sjellë siguri, qetësi, mirëqenie e lumturi në Turqi, në rajon e në botë. /tesheshi.com/
