Kreu i Kishës Ortodokse Ruse, mbështetja e së cilës për “operacionin special ushtarak” të Moskës në Ukrainë ka mërzitur shumë të krishterë, tha se shpresonte që konflikti të përfundonte së shpejti, por këtë herë ai nuk e dënoi apo kritikoi atë.
Përpara Katedrales së Krishtit Shpëtimtar të Moskës në prag të Pashkëve Ortodokse, Patriarku Kirill spërkati me ujë të shenjtë mbi bukën tradicionale të Pashkëve të dekoruar gjallërisht, duke thënë se shumë bukë do të dërgoheshin në Donbas në Ukrainën lindore gjatë ditës.
“Dhëntë Zoti që kjo dhuratë e Pashkëve t’i ndihmojë të përfshirët në këtë konflikt të vështirë të qetësojnë zemrat, mendjet, shpirtrat e tyre, t’i japin fund konfliktit sa më shpejt dhe të arrijmë paqen e shumëpritur. Vetëm kështu do të jetë devotshmëria dhe besimi i forcuar”, tha ai.
Patriarku Kirill, një aleat i presidentit rus Vladimir Putin, ka mbështetur më parë ndërhyrjen ushtarake të Moskës në Ukrainë. Edhe pse foli për nevojën e pajtimit, ai nuk e vuri në dyshim apo kritikoi fushatën ushtarake të Rusisë.
“Zoti para së gjithash pajtoftë popullin tonë në Ukrainë, në Donbas, ku ende derdhet gjak”, tha Kirill, i cili, ashtu si Putini, beson se rusët dhe ukrainasit janë në thelb një popull.
“Zoti i shëroftë plagët e shkaktuara njerëzve, familjeve të mbetura pa bukë, prindërve që kanë humbur fëmijët e tyre dhe fëmijëve që kanë humbur prindërit”.
Mbështetja e patriarkut për aksionin ushtarak rus, në të cilin mijëra ushtarë dhe civilë ukrainas janë vrarë deri më tani, ka zemëruar disa anëtarë të Kishës Ortodokse Ruse, por edhe anëtarë të kishave jashtë vendit, të lidhura me Patriarkanën e Moskës.
Rusia pretendon se po kryen një “operacion special ushtarak” në Ukrainë me qëllim “çmilitarizimin” dhe “denazifikimin” e vendit, por Ukraina dhe Perëndimi e refuzojnë këtë si një justifikim të pabazuar.
Nga ana tjetër, Kreu i Kishës Katolike Romake, Papa Françesku, ka hequr dorë nga një plan për t’u takuar me Kirillin në korrik. /tesheshi.com/
