Ministri i Jashtëm gjerman, Sigmar Gabriel pothuajse doli nga koraca diplomatike ku mesazhet përcillen me nja gjuhë gati të drunjtë dhe foli hapur fare, deri në pikën ku nuk është i nevojshëm komenti…
Zv.kancelari gjerman dhe ministri i Jashtëm i këtij vendi, Sigmar Gabriel, i cili është një socialdemokrat tipik gjerman, gjatë vizitës së tij në Tiranë ka qenë më shumë se ç’duhet i tillë.
Në konferencën e shtypit të dhënë pas takimit me Ditmir Bushatin, homologun e tij, shefi i diplomacisë gjermane ka qenë i prerë, i qartë dhe asnjë fjalë e dalë nga goja e tij nuk linte mundësi të intepretohej në dy mënyra.
Sigmar Gabriel ka një rol të rëndësishëm në zhvillimet e Shqipërisë, pasi ai bindi Edi Ramën të largojë Saimir Tahirin nga posti i ministrit të Rendit vetëm që të krijojë një mundësi për Bashën që të largohej nga çadra dhe të hyjë në Parlament.
Ka qenë pikërisht vizita e papritur e Edi Ramës në Berlin dhe një dalje e përbashkët me Sigmar Gabriel që çoi dy ditë më pas në shkarkimin e Saimir tahirit. Por Basha as lëvizi një centimetër madje u tall me lëvizjen.
Por nismëtar i kësaj lëvizjeje ishte pikërisht Gabriel por edhe kolegia e tij në qeveri dhe njëherësh eprorja, Angela Merkel, që edhe pse janë rivale politike janë edhe bashkëpunëtorë në qeverisje.
Në deklaratën e përbashkët me homologun Ditmir Bushati ai i dërgoi mesazh Lulzim Bashës që të mos kërkojë më komplotistë në BE, të mos kundërshtojë vettingut dhe të futet në zgjedhje.
Më poshtë deklaratat e Gabriel që s’kanë nevojë për koment:
“Kemi qenë shumë të gëzuar që në parlamentin shqiptar me konsensusin e qeverisë dhe opozitës u mundësua pikërisht miratimi i ligjeve të rëndësishme.
Tani për fat të keq, me shqetësim të madh, madje pa e kuptuar mjaft mirë, konstatojmë se reforma e drejtësisë është duke u penguar. Askush në Europë kam përshtypjen nuk e kupton si duhet këtë, pikërisht faktin që parlamentarët e zgjedhur bojkotojnë parlamentin. Në vendin tim dhe në Europë kjo është diçka plotësisht absurde, që parlamentarët, deputetët e zgjedhur refuzojnë të bëjën punën e tyre në parlament.
Në vend të kësaj ata mblidhen në çadër duke realizuar një lloj opozitë përkundër parlamentetit anëtarë të së cilit vetë janë.Kjo është një rrethanë që ne nuk mund dhe nuk duam ta pranojmë. Është absurde dhe për shkak se pas pak javësh do të kemi zgjedhjet në Shqipëri dhe rasti më normal do të ishte që nëse deputetët nuk janë të kënaqur me atë çka realizon një qeveri ta anatemojnë këtë në kuadër të fushatës elektorale.
Parimi bazë i një demokracie është që në bazën e ligjeve të vlefshme dhe Kushtetutës pakicat të mund të pranojnë shumicat sepse në të ardhmen do të kenë vetë shansin për tu shndërruar në një shumicë, dukë ndryshuar kësisoj ligjet. Thelbi është të respektojmë Kushtetutën, shumicat, edhe nëse jemi pjesë e një pakice të caktuar sepse në demokraci mbi bazën e Kushtetutës do të mund të punohet vetë për tu shndërruar në një shumicë sikurse ishte rasti i qeverisë së tanishme që deri pak kohësh ka qenë një pakicë.Këtë kërkojmë të mbështesim në ato shtete që kërkojnë të bëhen pjesë e BE. Ajo që është e paimagjinueshme është që një pakicë nuk përpiqet të ndryshojë gjendjen përmes zgjedhjeve por bojkotit të parlamentit.
Kështu lind dhe përshtypja që ka një farë frike lidhur me zbatimin e reformës në drejtësi dhe që në të ardhmen nuk do të mundin kësisoj të ndjekin interesat e tyre siç mund të ketë qenë rasti në të shkuarën. Për ne është mjaft e rëndësishme që mbi bazën e Kushtetutës dhe ligjeve të vlefshme të zbatohet reforma në sistemin e drejtësisë dhe së dyti ne apelojmë si qeverinë ashtu dhe parlamentin që të punojnë mbi bazën e Kushtetutës dhe ligjeve të vlefshme për zhvillimin e rregullt të zgjedhjeve të lira dhe të ndershme.
Këtë gjë do ta përcjellim si mesazh edhe përfaqësuesve të opozitës që e tërë qeveria federale, kancelarja federale, janë të bindjes se bojkoti i parlamentit nuk është një rrugë e pranueshme për të shprehur vullnetin. Pati një letër të kolegëve në koalicionin qeveritar, unë vetë jam social-demokrat por edhe partnerët tanë nga CSU-CDU kanë shkruar një letër drejtuar opozitës së këtushme. Edhe nje pjesë e partive të PPE kanë apeluar për të mos bllokuar reformën e drejtësisë në vend.
Një politikë që përpiqet të pengojë këtë largohet nga Europa. Çfarë është më e rëndësishme, interesi i vendit dhe popullësisë, përfaqësimi i tyre apo interesat e partisë politike? Pikërisht këtu dallohen burrat dhe gratë e shtetit prej shumë atyre të tjerëve të angazhuar në politikë pikërisht përmes faktit se në qendër të vëmendjes së punës së tyre vendosin interesat e qytetarëve. Interesi i qytetarëve shqiptarë është shteti i së drejtës, vendosja e tij në qendër të vëmendjes dhe jo grupimeve më të vogla.
Ne duam të bëjmë gjithçka që është në mundësitë tona për të bindur opozitën që të mbërrihet në zgjedhje të rregullta, në një qeveri të re, çka është elementi i çdo demokracie dhe debateve mes një opozite dhe qeverie. Europa mund të bëjë shumë më tepër për vendet e Ballkanit Perëndimor dhe duhet të bëjë më tepër.Rruga drejt BE kërkon pak kohë.Por në kuadër të hapjes së negociatave për anëtarësim në BE, Europa mund të bëjë shumë më tepër për ti përmirësuar kushtetet e jetesës së qytetarëve të Shqipërisë./tesheshi.com/
