Senatori amerikan John McCain, në fjalimin e tij në Kuvendin e Kosovës ka përcjellë mbështetjen amerikane duke dhënë mesazhet për politikën vendase.
Për dallim zyrtarë të tjerë të huaj, McCain ka folur shumë pak për çështjen e Demarkacionit.
Krejt çfarë ka thënë është se “miratimi i marrëveshjes për shënjimin e kufirit me Malin e Zi do të paraqiste një hap të rëndësishëm për të ardhmen e Kosovës”, por nuk u ka bërë deputetëve thirrje të drejtpërdrejt ta votojnë.
Më tej, zyrtari i lartë amerikan është ndalur tek themelimi i ushtrisë, me ç’rast ka përsëritur qëndrimin e SHBA-së, duke thënë se transformimi i FSK-së në ushtri duhet të bëhet me ndryshime kushtetuese
“Ky është vendim sovran të cilin mund ta merr vetëm populli i Kosovës. Ky proces duhet të jetë gradual dhe gjithëpërfshirës, duhet të përfshijë edhe serbët e Kosovës. Besoj se ky transformim do të avancojë përparimin e Kosovës dhe qasjen në ndihma ushtarake. Si kryesues i komisionit të Senatit për Forca të Armatosura, ju siguroj se do të bëj përpjekje maksimale për të ndihmuar shndërrimin e FSK-së në forcë të vërtetë sigurie të Kosovës, e cila duhet të bëhet me ndërrime kushtetuese”, theksoi McCain.
McCain foli edhe për dialogun me Serbinë dukë thënë se është shumë i rëndësishëm integrimi i serbëve në institucioneve si dhe normalizimi i marrëdhënieve me këtë vend.
“Për këtë normalizim kam biseduar edhe dje në Beograd”, ka thënë McCain.
Ai rikujtoi po ashtu punën e tij që në vitet ’90 kishte bërë me senatorin e atëhershëm të SHBA-së, Joe Biden për të shpëtuar popullatën shqiptare nga gjakderdhja, por edhe për të punuar për pavarësimin e saj.
“Përkushtimi i SHBA-së për Kosovën ka qenë partiak gjithmonë. Sot ndjehem krenar që para jush për herë të parë pas pavarësisë, jam dyshimtar i arritjeve të juaja. Para 9 vitesh Kosova miratoi Kushtetutën, u njoh nga më shumë se 100 vende, u anëtarësuar nga organizata të ndryshme ndërkombëtare dhe ka arritur përparim në integrimin drejt BE-së, integrimin e serbëve dhe normalizimin e marrëdhënieve përmes BE-së”, pohoi McCain.
Ai foli edhe për termocentralin “Kosova C”, ku premtoi se SHBA do të vazhdojë të përkrahë këtë projekt të rëndësishëm. Nga Kosova, senatori amerikan pritet të udhëtojë drejt Shqipërisë. /tesheshi.com/
